Թող հանգիստ թողնեն մեր կրպակավարին. «Պրեսս Ստենդ»-ի կամայականության հերթական «զոհը» (ֆոտո, վիդեո)

Հանրապետական պատգամավոր Արման Սահակյանին պատկանող «Պրեսս Ստենդ» ընկերությունը կրպակավար Սվետլանա Մանուկյանին օրերս անակնկալի է բերել:

Տիկին Մանուկյանը NEWSPRESS.am-ի հետ զրույցում նշեց, որ մի քանի օր առաջ, բացելով համակարգիչը՝ իր անվան փոխարեն կարդացել է այլ աշխատողի անուն:

Սա իսկապես տհաճ անակնկալ էր տիկնոջ համար: Մինչ այդ, սխալ տեղեկություն էին տարածել կնոջ հասցեին, թե իբր նա չարաշահում է իր աշխատանքը, և իբր, ամսագրեր ու գրենական պիտույքներ վաճառելուն զուգահեռ` նաև սուրճ է եփում ու վաճառում գնորդներին:

Դրան անմիջապես հետևել են ստուգումները: Սակայն ո՛չ սրճեփ, ո՛չ սուրճ եփելու համար կասկածելի որևէ այլ պարագաներ չեն հայտնաբերվել կրպակում: Տիկին Սվետլանան նեղսրտած ու վիրավորված պատմում էր, թե ինչպես էին ստուգողներն անգամ աղբի դույլի մեջ սկսել փնտրել սուրճի թղթերը:

Կրպակը գտնվում է այն դպրոցի մուտքի մոտ, որտեղ սովորում են երեխաներս: Անկեղծ լինելու համար, պետք է նշեմ, որ ես ամեն օր անցնում եմ այդ կրպակի կողքով, իսկ շաբաթվա մեջ մի քանի անգամ էլ օգտվում եմ կրպակից: Բայց երբեք ո՛չ սուրճի բուրմունք եմ զգացել այդտեղից, ո՛չ սուրճ խմողների հանդիպել ու ո՛չ էլ այդ կնոջը, թեկուզ իր համար, սուրճ եփելիս տեսել:

Սա ակնհայտ սուտ է, որը շահարկվել է միայն այն բանի համար, որպեսզի կնոջ փոխարեն «տեղավորեն իրենց մարդուն»: Ի դեպ, վերջինս հենց ինքն է խոստովանել, որ իրեն «վերևներից» են միջնորդել:

Ստուգումներն արդեն իսկ տհաճ անակնկալ էին, թեկուզ և դրանց արդյունքում ոչ մի օրինախախտում չի հայտնաբերվել, բայց կնոջ համար ավելի վիրավորական է եղել այն, որ արդեն հաջորդ առավոտյան նրան ներկայացրել են ապրանքների ցանկն արդեն այլ կրպակավարի անունով:

Երևույթն իսկապես տհաճ է ու վիրավորական. հատկապես, երբ կրպակից օգտվողները ջերմությամբ ու սիրով են խոսում կրպակավարի աշխատանքի մասին ու երբեք նրանից ոչ մի բացասական վերաբերմունքի չեն արժանացել: Նրանցից մի քանիսն էլ նույնիսկ ստորագրահավաք են կազմակերպել՝ պահանջելով աշխատանքից չհեռացնել իրենց կրպակավարին:

Հարկ է նկատել, որ կրպակավարները վարձատրվում են մինիմալ աշխատավարձով, կրպակները զերծ են սանիտարահիգիենիկ հարմարություններից, և այդ պայմաններում նրանց աշխատանքն սկսվում է առավոտյան 8-ին և ավարտվում երեկոյան 19:00-ին:

Ու չնայած դրան՝ «Պրեսս Ստենդ» ընկերությունը շարժվում է իր կամայականություններով ու իր չափորոշիչներով:

Սվետլանա Մանուկյանը միակ կրպակավարը չէ, ով դժգոհում է «Պրեսս Ստենդ»-ից. պարբերաբար ներկայացվող պակասորդներ, որոնք ստիպված են վճարել, ծանրաբեռնված աշխատանքային գրաֆիկ, որի համար հավելավճար չեն ստանում և այլն:

Մեր տեղեկություններով՝ «Պրեսս Ստենդ»-ից դժգոհ կրպակավարները շատ են, բայց նրանց մեծ մասը չի բարձրաձայնում իր խնդիրների մասին, քանի որ ընկերությունն սպառնում է նրանց տուն ուղարկել:

Արմինե Մկրտումյան