Երկրի «մակարոնն» են տարել. զարմանալ պետք չէ

Երեկ Ֆեյսբուքում ակտիվ քննարկվեց մահվան ելքով վթարից հետո մի տիկնոջ կողմից մեկ պարկ մակարոն «թռցնելու» հարցը: Մարդիկ զարմանում էին, որ մահվան դեպք կա, և տիկինը նմանօրինակ արարք է իրեն թույլ տալիս:

Առանց քննարկելու տիկնոջ արարքի դրական կամ բացասական կողմերը, ուղղակի հիշեցնենք, որ 1988թ. երկրաշարժից հետո միլիոնավոր դոլարների օգնություն եկավ Հայաստան, որի հիմնական մասն ուղղվեց մեծ ու փոքր պաշտոնյաների գրպանները. մարդիկ հարստացան երկրաշարժի շնորհիվ՝ ում ձեռքն ինչ ընկավ, տարավ տուն, իսկ դա 25 հազար մահացած մարդկանց, երկրի հյուսիսային շրջաններն ավերվելու ժամանակ, հենց թարմ հողի վրա:

Չմոռանանք` նույն Շիրակի մարզում ինչպես բնակարաններ կառուցեց «Գլենդել Հիլզ»-ը և մարդկանց մի մասին թողնելով անօթևան` երկրորդ անգամ տնազուրկ դարձրեց` ՀՀ բյուջեից գրպանելով միլիոնավոր դոլարներ:

Այնպես որ՝ պետք չէ զարմանալ մեկ պարկ մակարոնի վրա: Ժամանակ առաջ մեր վրացի գործընկերներից մեկը, երբ խոսում էինք ալյուրի հարստացման մասին, կատակեց՝ զարմանում եմ, որ հայերը որևէ հարստացման դեմ են:

Ցավոք, ճիշտ էր: Քարից հաց քամել, օդից փող քամել, ամեն կերպ փող աշխատել, միլիոններ դիզել` ուրիշների աշխատանքի և քրտինքի հաշվին. կարծես թե նորմալ է:

Հիշենք, որ մեր պետական հիմնարկներում ինչպես չեն վճարում աշխատողների տրանսպորտի գումարները կամ քիչ են վճարում, ինչպես են յուրացնում թոշակառուների գումարները, ինչպես ցածր են վճարում աշխատողներին: Դեռ զարմանում են, որ մարդիկ այդ կոպեկներով չեն կարողանում ապրել, երբ իրենց միլիոնները քիչ են, ինչպես մեռած հոգիների հաշվին ընտրական և ոչ միայն առևտուր են անում: Այս ցանկը կարելի է շարունակել:

Ի դեպ, 90-ականներին, երբ պատերազմ էր գնում, այն ժամանակ, երբ որոշ մարդիկ հարստացան, հարց չի՞ առաջանում` ինչպես հարստացան, երբ երկիրը զենք էր գնում, ու բանակին չէր կարողանում կերակրել:

Այնպես որ՝ զարմանալ պետք չէ տիկնոջ մեկ պարկ մակարոնի վրա, հատկապես երբ այս տարիներին մեր «մակարոնն» են տարել, երկրի «մակարոնն» են տարել ու դեռ աչք են տնկում ուրիշ ձեռքի մեկ հատիկ «մակարոնին»:

Զարմանալի է, որ զարմանում են մեկ պարկ մակարոնի վրա, ինչպես հաց գողացողը պատժվում, իսկ հացի գործարան թալանողը` ոչ, այնպես էլ մեկ պարկ մակարոնը մարդիկ տեսան, իսկ երկրի թալանված մակարոնները չտեսան:

NEWSPRESS.am