Նաիրիտցիներին խոստացան ընդունել ԱԺ ճաղերից այն կողմ, երբ դիմում գրեն (ֆոտո, վիդեո)

«Երբ պետությանը փող ես պարտք լինում՝ տոկոսով հետ են վերցնում, իսկ երբ պետությունն է քեզ պարտք՝ տարիներով կարող են չտալ… Ձեր փողը փող ա, մեր փողը փող չի՞»: Այսօր Ազգային ժողովի դիմաց կազմակերպված բողոքի ակցիայի ժամանակ վրդովված ասաց «Նաիրիտ» գործարանի նախկին աշխատող Նորիկ Ղարհամանյանը:

Նաիրիտցիներն ԱԺ-ի դիմաց էին՝ հույսով, որ պատգամավորներից գոնե մեկը կլսի իրենց ու կբարձրացնի «Նաիրիտ»-ի խնդիրը խորհրդարանոմ:

ԱԺ ճաղերից այս կողմ, նրանք փորձում էին պատգամավորների ուշադրությունը հրավիրել իրենց՝ «Նա-ի-րիտ, աշ-խա-տանք, տո-կո-սի վե-րա-դարձ» վանկարկումներով:

Այն ժամանակ, երբ արդեն թվում էր՝ ոչ ոք նրանց չի լսում, նաիրիտցիներին մոտեցան «Ծառուկյան» դաշինք խմբակցության պատգամավորներ Սերգեյ Բագրատյանը և Արայիկ Աղաբաբյանը:

Ինչպես և ակնկալվում էր, վերջիններս շատ բան չխոստացան: Թեև այսօր բոլորը գիտեն «Նաիրիտ»-ի խնդիրն ու նաիրիտցիների պահանջը, սակայն պատգամավորները հարկ համարեցին ևս մեկ անգամ մանրամասնորեն լսել նաիրիտցիներին: Բայց դրա համար նաիրիտցիները ստիպված կլինեն բյուրոկրատական քաշքշուկների մեջ ընկել: Նրանք դեռ պետք է դիմում գրեն դաշինքին, պատասխան ստանան, որից հետո միայն նաիրիտցիներից մի քանիսին կարող են ընդունել. կզրուցեն խնդրի շուրջ, կլսեն պահանջները, այնուհետև ԱԺ-ում նրանց հարցը կբարձրացնեն: Կամ, նրանց իսկ ձևակերպմամբ, կփորձեն միասին ինչ-որ բանի հասնել:

Թե կոնկրետ ինչի կհասնեն պատգամավորները, և արդյոք սա հերթական փափուկ բարձը չէ՞ր նաիրիտցիների գլխի տակ՝ ժամանակը ցույց կտա, բայց նաիրիտցիներն՝ իրենք այնքան էլ մեծ հույսեր չեն կապում խոստումների հետ՝ հատկապես երբ այդ ժամանակը նրանց օգտին չէ, և «Նաիրիտ»-ից շուտով գուցե ոչինչ չի մնա:

Մանրամասները՝ տեսանյութում: