Ավտովթար՝ Հերացի փողոցում. վարորդը մահացել է. թարմացված (լուսանկարներ)

Սեպտեմբերի 27-ին, ժամը 06:13-ին ահազանգ է ստացվել, որ Երևան քաղաքի Հերացու փողոցում՝ թունելի մոտակայքում, տեղի է ունեցել ՃՏՊ՝ բեռնատարը շրջվել է, կա տուժած, առկա է վառելիքի արտահոսք. անհարժեշտ է փրկարարների օգնությունը։

Դեպքի վայր են մեկնել երկու մարտական հաշվարկ և հատուկ նշանակության փրկարարական աշխատանքների իրականացման կենտրոնի փրկարարական ջոկատը:

Պարզվել է, որ Հերացու և Կորյունի փողոցների խաչմերուկի մոտակայքում «Volvo» մակնիշի 34 CO 003 պետհամարանիշով ավտոմեքենան 02Լ207 պետհամարանիշով կցորդիչով դուրս է եկել ճանապարհի երթևեկելի հատվածից և բախվել «Mercedes E» մակնիշի 35 GD 484 պետհամարանիշով (վարոդ՝ Մ. Մ.) ավտոմեքենային:

Փրկարարները 1972 թ. ծնված Ա. Ա.-ի դին դուրս են բերել ավտոմեքենայից և տեղափոխել շտապօգնության՝ դի տեղափոխող ավտոմեքենա:

Փրկարարները իրականացրել են ճանապարհի լվացման աշխատանքներ և հերթապահել մինչ վառելիքի արտահոսքի դադարելը:

Shamshyan.com-ի տեղեկություններով էլ մեկ ժամից ավել պահանջվեց փրկարարներից, մինչև կարողացան վարորդի դին դուրս բերել ավտոմեքենայից: Բախման հետևանքով մեքենայում բարձված ողջ սննդամթերքը, որոնք հիմնականում մակարոնեղեն էին, թափվել էր գետնին և անգամ շպրտվելու արդյունքում ողջ սննդամթերքը լցվել էր ճանապարհի հանդիպակաց գոտում՝ վնասելով նաև մեկ այլ ավտոմեքենա: