«Բացառապես սուտ հերյուրանք է». ՇՊՀ ռեկտորը՝ չարաշահումների և մեղադրանքների մասին (տեսանյութ)

Շիրակի պետական համալսարանի ռեկտոր Սահակ Մինասյանն արձագանքել է համալսարանում տեղի ունեցած չարաշահումների մասին շրջանառվող լուրերին:

Նա ասուլիսի ժամանակ ասել է, թե իբր իրենք շատ թափանցիկ են աշխատում:

«Կարող եք ցանկացած խնդրի հետ կապված մեր համապատասխան ստորաբաժանման հետ քննարկել, նայել, ուսումնասիրել»,- հայտարարել է ռեկտորը:

Հիշեցնենք, որ բուհի դասախոսներ՝ Հովհաննես Խորիկյանը և Գագիկ Համբարյանը բաց նամակ էին հղել ՀՀ նախագահին և վարչապետին։ Երկու դասախոսները ռեկտորին մեղադրում են յուրայիններին, այդ թվում գործավարուհուն 250-300 հազար դրամանոց աշխատավարձեր հատկացնելու մեջ։ Միևնույն ժամանակ՝ բուհի դասախոսները ստանում են 80 հազար դրամ, իսկ ուսանողների վարձավճարներն էլ էականորեն ավելացել են:

Սահակ Մինասյանը նկատեց, որ ունեն դասախոսներ, ովքեր իր մերձավորներից ավելի շատ աշխատավարձ են ստանում:

«Դասախոսական մասի աշխատավարձը չի ամրագրվում հաստիքացուցակով: Այսինքն՝ 50 հազար, թե 150 հազար՝ որոշվում է հատկացված ժամաքանակով. կան դասախոսներ, որոնք ունեն 2-3 դրույթ և կան մարդիկ, որ 0.25 կամ 1 դրույքով են աշխատում»,- պարզաբանեց ռեկտորը՝ հավելելով, որ այս կարգը ժառանգել է նախորդից, և այս մեկ տարվա ընթացքում չէր կարող որևէ բան փոխել, քանի որ բոլոր դասախոսների հետ 1 տարի ժամանակով պայմանագրեր են կնքվել:

Անդրադառնալով բուհի ադմինիստրատիվ հատվածի աշխատավարձերին` Սահակ Մինասյանն ասաց, որ ներկայացված տվյալները չափազանցված են, նման աշխատավարձեր չունեն:

Ինքը՝ ռեկտորը, մոտ կես միլիոն դրամ աշխատավարձ է ստանում:

Ինչ վերաբերում է նախագահի աջակցություն ունենալուն և «անձեռնմխելի» լինելուն՝ ռեկտորն ասաց. «բացառապես սուտ հերյուրանք է»:

Նա անդրադարձել է նաև իր մասին հնչեցրած մյուս մեղադրանքներին:

Ասուլիսն ամբողջությամբ՝ տեսանյութում