«Խոսրովի անտառի» հրդեհի հետևանքով գիհուտների անվերականգնելի վնաս կա, մորեխների և սողունների անկումներ

«Խոսրովի անտառ» պետական արգելոցում տեղի ունեցած հրդեհի հետևանքով հիմնական կորուստը գիհու ծառատեսակների մասով է: Այս մասին լրագրողների հետ հանդիպման ժամանակ ասաց ՀՀ բնապահպանության նախարար Արծվիկ Մինասյանը՝ հավելելով, որ 200 հա գիհու անտառ է այրվել:

«Գիհուտների անվերականգնելի վնաս կա: Այրված խոտածածկ տարածքները կազմել են 1100 հա, սրանք կվերականգնվեն աշնանային ու գարնանային անձրևների ժամանակ»,-ասաց նա և նշեց, որ Խոսրովի արգելոցում արգելվում է միջանկյալ միջամտությունը և ամերիկացիներ առաջարկում են գիտական գործողություններ իրականացնել, որը հնարավորություն կտա ավելի արագ աճել գիհուտներին:

Կաղնուտների մասով համեմատաբար գրեթե կորուստներ չեն եղել: 2200 հա վառված տարածքի մեջ կաղնու անտառածածկ տարածքը կազմում է 900 հա:

Ինչ վերաբերում է կենդանական աշխարհին, ապա խոշոր կենդանիների մասով ևս կորուստ չեն արձանագրել: Եղել են մորեխների և սողունների անկումներ:

«Մենք խոշոր կենդանիների որոշակի տեղաշարժ ունենք, բայց նկատվում է վերադարձ իրենց բնակատեղիները»,-ասաց նա:

Նախարարը նկատեց նաև, որ թեև առաջին հայացքից թվում էր, թե մարդիկ շատ սրտացավ վերաբերմունք ունեն կատարվածի նկատմամբ, սակայն երբ հատուկ հաշվեհամար բացվեց, դեպքից մի քանի օր հետո միանգամից բոլորը մոռացան:

Ամեն դեպքում, Արծվիկ Մինասյանի խոսքով, կառավարությունը մտադրություն ունի ընդլայնել Խոսրովի արգելոցի տարածքները: