Ագարակի միակ եկեղեցին ցորենի պահեստից դարձյալ վերածվեց սրբավայրի (ֆոտո)

Սեպտեմբերի 23-ին Գուգարաց թեմի առաջնորդ Տեր Սեպուհ արքեպիսկոպոս Չուլջյանի ձեռամբ վերաօծվեց Ագարակ համայնքի Սուրբ Աստվածածին եկեղեցին: Այդ մասին հայտնում են Լոռու մարզպետարանից:

Ագարակցիների համար այս չափազանց կարևոր միջոցառմանը մասնակցում էին մարզպետ Արթուր Նալբանդյանը, մարզպետարանի պաշտոնյաներ, Ստեփանավանի համայնքապետ Միքայել Ղարաքեշիշյանը, տարածաշրջանի համայնքապետեր, եկեղեցու վերանորոգման նվիրատուները, հոգևոր հայրեր:

Ագարակ համայնքի Սուրբ Աստվածածին եկեղեցին կառուցվել է 1812 թվականին և չնայած այն տասնամյակներ շարունակ չի համարվել գործող եկեղեցի, սակայն եղել է սիրված ու միակ սրբավայրը Ագարակ համայնքում: Եկեղեցին իր ճարտարապետական հորինվածքով եռանավ բազիլիկաձև է: Տեղացիները պատմում են, որ խորհրդային տարիներին եկեղեցին ծառայել է որպես ցորենի պահեստ և ժամանակի ընթացքում ավերվել։ 1892 թվականին համայնքի ջանքերով եկեղեցին մասամբ վերականգնվել է, իսկ 2001 թվականին Սամվել Ռշտունու նախաձեռնությամբ կատարվել են ծածկի հիմնանորոգման աշխատանքներ:

Վերջին ամիսներին սկսված վերանորոգման աշխատանքները սպասումի մեջ էին պահում համայնքի բնակչությանը: Այսօր եկեղեցին լիովին պատրաստ է ընդունելու Ագարակի և հարակից համայնքների բնակիչներին:

Վերականգնող ճարտարապետը Սուրեն Աբովյանն է:

Գուգարաց թեմի առաջնորդարանի ֆինանսավորմամբ վերակառուցվել է եկեղեցու խորանի Սուրբ Սեղանը, տանիքի տախտակապատումը և թիթեղյա ծածկը, եկեղեցու պատերի սվաղը, մուտքի դռան անձրևածածկը, մետաղապլաստե պատուհանները, եկեղեցու շուրջբոլոր մայթի կառուցումը, ինչպես նաև իրականացրվել է հարդարման աշխատանքներ:

Շինարարական աշխատանքներին օժանդակել է նաև Ստեփանավանի քաղաքապետը իսկ թեմակալ առաջնորդի հորդորներին ընդառաջ` Ագարակ համայնքի ղեկավար Ռուբիկ Բարխուդարյանը և մի շարք այլ բարերաներ դրամական աջակցություն են ցուցաբերել եկեղեցու նորոգումն ավարտին հասցնելու և այն կահավորելու ու սրբապատկերներով զարդարելու գործում:

Եկեղեցու նորաօծ խորանում թեմակալ առաջնորդի հանդիսապետությամբ` տարածաշրջանի հոգևոր հովիվ Տեր Ղազար քահանա Թորոսյանի ձեռամբ մատուցվեց Սուրբ Պատարագ:

Պատարագի ավարտին Սրբազան Հայրն իր օրհնության ու շնորհավորանքի խոսքն ուղղեց ներկաներին և օրհնեց բարերարներին, ովքեր իրենց մեծ և փոքր ներդրումը բերեցին եկեղեցու վերանորոգման աշխատանքներին, ու սրբապատկեր նվիրեց Ագարակի համայնքապետին:

«Կարևորելով եկեղեցաշինությունը՝ առավել կարևորում եմ դարերի պատմություն ունեցող մեր վանքերի ու եկեղեցիների վերականգնումը և այս հարցում նաև Գուգարաց թեմի առաջնորդի մեծ ջանքերը: Մեր պատմական սրբավայրերում մեր նախնիների շունչն է: Դրանք պետք է սրբորեն պահպանենք»,- իր խոսքում ասաց Լոռու մարզպետը:

Ագարակ համայնքի ղեկավարի տեղակալ Արսեն Ալիխանյանի կողմից ուխտավորներին մատուցվեց մատաղ: Գուգարաց թեմի առաջնորդը եկեղեցու վերաօծման օրը հայտարարեց Ագարակ գյուղի օր: