«Ելք»-ի համար անընդունելի է Սերժ Սարգսյանի երրորդ վերարտադրման պրոցեսը

ԵՏՄ-ից դուրս գալու նախագիծը կարևոր միջոց է՝ առաջին հերթին հանրության հետ երկխոսություն սկսելու և այս թեմայով հանրային քննարկում ծավալելու համար, ինչն ստացվել է: Այսօր՝ ԱԺ ճեպազրույցների ժամանակ ասաց «Ելք» խմբակցության ղեկավար Նիկոլ Փաշինյանը:

«Ես կարծում եմ, որ այսօր արդեն մենք այդ նպատակին հասել ենք: Ես որ լրատվամիջոցը միացնում եմ, բոլորը գրում են այդ թեմայի մասին: Սա նշանակում է, որ սկսված է հանրային մեծ դիսկուրս: Ե′վ ՌԴ-ից, և′ ԵՏՄ այլ երկրներից մենք ավելի ու ավելի բարձր մակարդակներով արձագանքներ ենք լսում: Սա նշանակում է, որ դիսկուրսն սկսված է, և մենք ունենք բոլոր լծակները՝ այդ դիսկուրսը շարունակելու ու հարցին անհրաժեշտ խորությամբ մոտենալու համար»,- ասաց Փաշինյանը:

Նրա խոսքով՝ Սերժ Սարգսյանի՝ վարչապետի թեկնածության հարցը տեղավորվում է ԵԱՏՄ-ից դուրս գալու պահանջների մեջ: Փաշինյանը նշեց, որ ընդհանրապես իրենց համար ցանկացած ՀՀԿ-ականի թեկնածություն անընդունելի է։ Իսկ Սերժ Սարգսյանի պարագայում՝ առավել ևս:

«ԵԱՏՄ երկրներում առկա ավտորիտար մեթոդները շարունակական ներմուծում են ունենում Հայաստանի Հանրապետություն։ Այս իմաստով Հայաստանի ԵԱՏՄ-ականությունը, եթե կուզեք՝ Հայաստանի ադրբեջանականացումն անընդունելի է։ «ԵԼՔ» դաշինքն իրենից կախված ամեն ինչ կանի նման սցենար թույլ չտալու համար»,-ասաց Փաշինյանը: