«Պատկերն ահավոր էր. «Դիլիջան» ազգային պարկում տնկված 500 ծառից ոչ մեկը չկար». Հայկ Հակոբյան (լուսանկարներ)

2013թ մայիսի 1-ին «Դիլիջան» ազգային պարկում ծառատունկ էր կազմակերպվել, որին մասնակցել էին լրագրողներ բնապահպանության նախարարության աշխատակիցներ, այն ժամանակվա նախարար Արամ Հարությունյանը: Տնկվել էին լորենիներ ու հացենիներ: Այդ մասին Ֆեյսբուքյան իր էջում գրել է նախկին նախարարի նախկին խոսնակ Հայկ Հակոբյանը:

«Այդ օրը բավականին շատ ծառեր տնկվեցին միայն ես 10-15-ը տնկել եմ: Այն տարածքը, որ տնկվել էին ծառերը գտնվում էր Պարզ լիճ տանող ճանապարհի 5-րդ կիլիոմետրի հարակից տարածքում:

Այդ ժամանակ բնապահպանության նախարարը լրագրողների հետ զրույցում հայտնեց, որ « Դիլիջանի կլիման թույլ է տալիս, որպեսզի բարձր կպչողականություն ապահովվի, իսկ պարկի աշխատակիցները կանեն ամեն ինչ տնկիները խնամելու համար»:
Երեկ Պարզ լիճ էի գնացել հիշեցի, որ այդ տարածքում 4 տարի առաջ ծառ էի տնկել, ակնկալելով, որ կտեսնեմ հասուն ծառեր, բայց պատկերը ահավոր էր: Տնկված մոտ 500 ծառերից և ոչ մեկը չկային, տեղում միայն մասրենիներ էին և մի այսպես ասած ճանապարհ, թերևս հակահրդեհային ճանապարհ, որն այնքան խորն էր փորած, որ վստահ եմ միջազգային դրամաշնորհներից ստացված այն եզակի հրդեհաշիջման մեքենան չէր կարողանա բարձրանալ այդ ճանապարհով:

Այս գրառումիցս հետո վստահեմ եմ, որ բնապահպանության նախարարությունը սկսելու է մասնագիտական բացատրություններ տալ առ այն, որ ծառերի որակը լավը չի էղել, դրա համար պաշտոնյաներ են ազատվել աշխատանքից, կամ ջուր չկար, կամ հողը միանգամից որակազրկվեց ու էլի ուրիշ պատճառներ: Ոչ, ուղղակի այդ տարածքում փարթամ խոտ է աճել, որը գյուղացիներին չվաճառելու գրավչությանը «Դիլիջան» Ազգային պարկի ղեկավարությունը դժվար դիմանար: Կամ էլ ուղղակի ներկա աշխատակազմը փորձում է վերացնել նախկինների կատարած աշխատանքը: Համաձայն եմ փոքր գործ է, մեկ հեկտարի վրա ծառ տնկելը, բայց ամեն ինչ սկսում է ծառ տնկելուց, տուն սարքելուց ու տղա ունենալուց:

Թող բնապահպանության նախարարությունում որոշեն, խոտ ծախե՞լը, ժառանգականության չպահպանո՞ւմը, թե՞ նախկին նախարարներից «վրեժ» լուծելու ցանկությունն է, որ ծառերի ոչնչացման առիթ է դարձել:

Կից ներկայացնում եմ այն նկարները, որոնք ես եմ լուսանկարել երեկ նույն տարածքում, ինչպես նաև մամուլի այն հաղորդագրությունը, որը տարածվել է 2013 թվականի մայիսին»: