Հայաստանում պաղպաղակի արտադրությունն աճել է, սակայն քանակը դեռևս որակ չէ

ՀՀ Ազգային վիճակագրական ծառայության հրապարակած տվյալների համաձայն՝ 2017 թվականի հունվար-հուլիս ամիսներին հանրապետությունում արտադրվել է 7 382.9 հազար լիտր, ինչը նախորդ տարվա նույն ժամանակահատվածի համեմատ աճել է 5.9%-ով:

Նշենք, որ 2016 թվականի հունվար-հուլիսին մեր երկրում արտադրվել է 6 972.6 հազար լիտր պաղպաղակ:
Միևնույն ժամանակ կաթի արտադրությունը նշված ժամանակահատվածում աճել է 0.5%-ով և կազմել 318.8 մլն լիտր։

Նշենք նաև, որ այս տարի Սննդամթերքի անվտանգության պետական ծառայությունը, ուսումնասիրելով պաղպաղակի շուկան, ներկայացրել էր արդյունքները. պարզվել էր՝ խախտումները ոլորտում քիչ չեն, և քանակը դեռ որակ չի ապահովում:

Ստուգումների ընթացքում արձանագրվել էին ինչպես փաստաթղթային-մակնշման, այնպես էլ լաբորատոր փորձաքննության արդյունքներով հաստատված խախտումներ:

Հիմնական խախտումներն են՝ մակնշման, հումքի և փաթեթավորող նյութերի փաստաթղթավորմանը ներկայացվող պահանջների անհամապատասխանություններ, համապատասխանության գնահատման ընթացակարգերի և աշխատակիցների նախնական ու պարբերական բժշկական զննությունների խախտումներ, սանիտարահիգիենիկ պահանջները չպահպանելու դեպքեր:

Պետական վերահսկողության շրջանակներում ապրանքատեսակներից նմուշներ էին վերցվել և ուղարկվել լաբորատոր փորձաքննության, որոնց արդյունքների հիման վրա կասեցվել են հինգ պաղպաղակ արտադրողների՝ «Թամարա և Անի» ՍՊԸ, «Ա. Ավետյանի Ա.Ս.Ա» ՍՊԸ, «Իգիթ» ՍՊԸ, «Ոսկե Պինգվին» ՍՊԸ, «Արմսվիթ» ՍՊԸ արտադրական գործընթացի առանձին գործառույթներ:

Մի քանի տնտեսվարող սուբյեկտների մոտ պետական վերահսկողության միջոցառումները դեռևս գտնվում են ընթացքի մեջ, և չի բացառվում ոլորտում նոր խախտումներ ի հայտ գան:

NEWSPRESS.am