Կառավարության գործունեության մեջ ոչ մի տրամաբանություն չկա. տնտեսագետ

Տնտեսագետ Վահագն Խաչատրյանը վստահեցնում է՝ Հայաստանի կառավարության գործողությունների միակ տրամաբանությունը քաղաքացու գրպանը դատարկելու մեծ ցանկությունն է:

Նա լրագրողների հետ զրույցում նկատեց, որ կառավարությունը հիմնականում իրավիճակային լուծումներ է գտնում, իսկ ռազմավարական ծրագրերն ուշադրությունից դուրս են մնում:

Տնտեսագետի դիտարկմամբ՝ կառավարությունը բազմաթիվ խոստումներ է տալիս, թվեր է ներկայացնում, բայց արդյունքում պարզվում է, որ ոչինչ էլ չի փոխվել:

Նրա խոսքով՝ այդ մասին են վկայում Ազգային վիճակագրական ծառայության հրապարակած տվյալները:

«Ներդրումների մասին խոստումներն իրականությանը չեն համապատասխանում, իսկ եթե ներկայացված թվերն իրական լինեին, ապա մեծ թվով աշխատատեղեր բացված կլինեին: Ներդրումներ ներգրավելու համար նախ պետք է նպաստավոր պայմաններ ստեղծել, բայց այդ նպաստավոր դաշտը չկա »,- նշեց տնտեսագետը:

Վահագն Խաչատրյանը ներկայացնում է պաշտոնական վիճակագրության տվյալները:

«Հունվար-հուլիս ամիսներին Հանրապետությունում բացվել է 189 աշխատատեղ: Օրինակ՝ հունվարին բացվել է 14 աշխատատեղ, մարտին՝ 49, ապրիլին՝ 40, հունիսին՝ 30, հուլիսին՝ 9: Իհարկե, պաշտոնապես հայտարարվում է, որ ստեղծվել է 2500 աշխատատեղ, բայց կցանկանայի տեսնել, թե որ բնագավառում է այդքան աշխատատեղ ստեղծվել»,- ասաց Վահագն Խաչատրյանը:

Այս ֆոնին տնտեսագետը կոռեկտ չի համարում պաշտոնյաների հայտարարությունները, թե մարդիկ իրենց մաշկի վրա զգում են տնտեսական աճը:

«Եթե եկամուտները չեն ավելանում, աշխատատեղեր չեն բացվում, ապա մարդիկ ինչպե՞ս պետք է զգան տնտեսական աճի ազդեցությունը: Եթե ինչ-որ տեղ կա, ապա այն մարդիկ են զգում, ովքեր միշտ օգտվում են ցանկացած իրավիճակից: Այսինքն՝ մարդկանց 5-10 տոկոսը, որոնք տիրապետում են Հայաստանի ազգային եկամտի մոտ 60-70 տոկոսին», – եզրափակեց տնտեսագետը: