Արվում է ամեն ինչ՝ հակառակորդին հուժկու պատասխան տալու համար. ՊՆ փոխնախարար

«Ապրիլյան մարտական գործողություններից հետո առաջնագծում լարվածությունը պահպանվում է»:
«Հակառակորդի ռազմաքաղաքական մարտավարությունն ու մեր անելիքները» թեմայով համաժողովին այս մասին ասաց ՀՀ պաշտպանության նախարարի առաջին տեղակալ Արտակ Զաքարյանը:

Նա նշեց, որ սկզբնական շրջանում հրաձգության դեպքերի քանակը կտրուկ նվազել էր, սակայն հուլիսից սկսած նկատվել է հրաձգության դեպքերի աճ: Իսկ 2016-ի նոյեմբերից հակառակորդը կիրառել է նաև ականանետ: Ներկայումս տարածաշրջանում իրավիճակը մնում է լարված:

Արտակ Զաքարյանը նկատում է՝ չնայած այն բանին, որ ԵԱՀԿ Մինսկի խումբը կարգադրել է խոշոր տրամաչափի զենք չկիրառել, սակայն հակառակորդը պարբերաբար նռնականետերի, ականանետների, հրանոթների կրակի և անօդաչու թռչող սարքերի հարվածների է ենթարկում մեր հերթապահ ստորաբաժանումները:

«Այս դրությամբ՝ դիվերսիոն հետախուզական խմբերի ներթափանցումների փորձեր չեն իրականացվում միայն այն պատճառով, որ մարտի 24-25 գիշերը հակառակորդի կողմից ձեռնարկված ներթափանցման փորձը մեր զորքերի կողմից հաջող կերպով կանխվել է: Թեև, հակառակորդի կողմից դիվերսիոն հետախուզական խմբերի ներթափանցումների փորձեր չիրականացնելը ժամանակավոր երևույթ է հանդիսանում: Արվում է ամեն ինչ հակառակորդին առավել վաղ հայտնաբերելու և հուժկու պատասխան տալու համար»,-ասաց փոխնախարարը:

Նա նշեց, որ մինչ Ադրբեջանը շարունակում է զարգացնել զինված ուժերի պատրաստությունը: ՀՀ ազգային բանակում ևս աշխատանքներն են տարվում սպառազինության ռազմական տեխնիկայի նոր նմուշների ստեղծման ու դրանց կատարելագործման ուղղությամբ: