Երբ գալիս է սեպտեմբերը. Երևանի Րաֆֆու անվան դպրոցն 90 տարեկան է (լուսանկարներ)

Կապույտ փուչիկներ, նարնջագույն վզկապներ, ծաղիկներ ու միայն զվարթ դեմքեր. ահա այսպես Երևանի Րաֆֆու անվան թիվ 36 հիմնական դպրոցում տրվեց 2017-2018 թթ-ի ուսումնական տարվա մեկնարկը:

Դպրոցականներին ուսումնական տարվա առիթով շնորհավորեց տնօրեն Նունե Ղազարյանը՝ իր բարեմաղթանքները հղելով աշակերտներին և ուսուցիչներին:

«Մենք ամեն ինչ անելու ենք, որպեսզի ունենաք բարեկարգ, գեղեցիկ և հարմարավետ դպրոց: Ձեզ մնում է միայն լավ սովորել ու բարձր պահել մեր դպրոցի պատիվը»,- իր խոսքում նշեց տնօրենը:

Հատկանշական է, որ դպրոցն արդեն դիմավորում է 90-րդ սեպտեմբերը: Այս երկար ու ձիգ տարիների ընթացքում կրթօջախը հասցրել է բարի համբավ ձեռք բերել՝ իր մանկավարժական անձնակազմով ու իր տված շրջանավարտներով, ովքեր տարբեր ոլորտներում բարձր են պահում իրենց դպրոցի անունը:

Հոբելյանական այս օրն էլ րաֆֆիականները դիմավորեցին մեծ շուքով: Միջոցառումն սկսվեց Հայաստանի դրոշի մուտքով:

Աշակերտներն իրենց վրա ևս կրում էին հայկական եռագույնը: Նարնջագույնը՝ որպես վզկապ, կապույտը՝ գոտի և կարմիրն իրենց ձեռքին ծածանելով նրանք մտան դպրոցի բակ: Րաֆֆիականները, դպրոցի ղեկավարության օգնությամբ ֆլեշմոբ էին նախաձեռնել, այնպես որ նրանց կանգնած դիրքի դասավորվածությամբ երևում էր Րաֆֆի բառը:

Ֆլեշմոբին հետևեց առաջին դասարանցիների մուտքը: Նրանք հեքիաթային աշխարհից հայտնվեցին դպրոցում, որը ներկայացվեց գեղեցիկ պարային համարի տեսքով:

Առաջին դասարանցիներին հանձնեցին գիտելիքի ոսկե բանալին: Փոքրիկները խոստացան լինել արժանի զավակը հայ ազգի և բարձր պահել դպրոցի պատիվը:

Գիտելիքի օրվան նվիրված միջոցառման ընթացքում դպրոցի ղեկավարության կողմից խրախուսական պատվոգրեր հանձնվեցին բոլոր այն աշակերտներին, ովքեր դրսևորվելով տարբեր ոլորտներում, բարձր արդյունքներ են գրանցել: Պատվոգրեր հանձնվեցին նաև դպրոցի լավագույն ճանաչված աշակերտին ու աշակերտուհուն:

Առաջին դասարանցիները ևս ունեին նվերներ: Նրանք ստացան Րաֆֆու պատկերով կրծքանշաններ, որոնք պետք է կրեն ուսումնառության ողջ ընթացքում:

Իսկ արդեն տնօրենի աշխատասենյակում երեխաներին սպասում էին այլ նվերներ: Տնօրենը հորդորեց բոլորին լավ սովորել և լինել առաջադեմ: Ծնողները շնորհակալություն հայտնեցին Նունե Ղազարյանին ջերմ ընդունելության համար:

Տնօրենի աշխատասենյակից հետո առաջին դասարանցիներին սպասում էր գեղեցիկ  ձևավորված դասասենյակը: Դասվար Շողիկ Աբրահամյանն աշակերտական սեղաններին էր դրել գեղեցիկ փաթեթավորված այբեննարաններն ու մյուս դասագրքերը, որոնց կողքին գրված էր աշակերտներից յուրաքանչյուրի անունը:

Առաջին ուսուցչուհին նաև պատրաստել էր տնակ, որի բնակիչները դարձան հենց իրենք՝ երեխաները: Նրանք իրենց լուսանկարները դրեցին տնակի պատուհաններից յուրաքանչյուրում:

Փոքրիկներին իրենց այցով անակնկալ մատուցեցին նաև ավագ ընկերները: Նրանք առաջին դասարանցիներին հորդորեցին լինել ուսման մեջ առաջադեմ և նվիրեցին նրանց հեքիաթի գրքեր:

Կարևորելով ուսուման մեջ առաջադիմությունը՝ դասվար Շողիկ Աբրահամյանը նշեց նաև, որ լավ սովորելուց բացի պետք է լավ մարդ լինել: Դպրոցի առաջ այսօր հենց այդ առաքելությունն է դրված՝ կերտել հայ ազգին արժանի ապագա քաղաքացի:

Արմինե Մկրտումյան