«Հրապարակ». Դպրոցներն օպտիմալացնում են, ՍԱՊԾ-ն՝ ուռճացնում

«Մինչ դպրոցներում, տեսչու­թյուններում և կառավարու­թյան համակարգում օպտիմալացում է ընթանում, և բյուջեի ծախսերի կրճատման հրամայական է դրված, Սննդի անվտանգության պետական ծառայությունում հաս­տիքներ են ավելանում: Աշխատող­ների թիվն ավելացել է 60-ով՝ 280 հոգուց դառնալով 340:

Գումարային տեսքով այդ 60 հաստիքը պե­տական բյուջեի վրա կարժենա մոտ 150 մլն. դրամ: ՍԱՊԾ պետի խորհր­դականների թիվն է ավելացվել՝ 2-ի փոխարեն այժմ նրան խորհուրդ կտա երեք անձ, որոնցից և ոչ մեկը սննդի մասնագետ չէ: Մեկը ներկայում մեր կառավարման համակարգում մեծ պահանջարկ վայելող «գազավիկների» դասից է՝ Եղիշե Մարգարյանը, որը գազի սպասարկման գրասենյա­կի նախկին աշխատող է, հետո «Բելիսս» ընկերություն բացեց և ՀԷՑ-ի մատակարարներից էր դեռևս Գլադունչիկի ժամանակներից:

Վիկտոր Միքայելյանը վերջին տարիներին «Ղ-Տելեկոմ» ՓԲԸ-ում է աշխատել, իսկ երրորդը՝ Հովհաննես Նավա­սարդյանը, բանկային մասնագետ է, Արդշինբանկի, Զարգացման հայկական բանկի և Կենտրոնական դեպոզիտարիայից եկած: Ի դեպ, ՍԱՊԾ պետ Իշխան Կարապետյանը, գալով պաշտոնի, փոխել է ծառայության պաշտոնի անձնագրերի մեծ մասը՝ վերացնելով մասնագիտական կրթու­թյուն ունենալու պահանջը: Նպատա­կը՝ որպեսզի ոչ մասնագետները կա­րողանան զբաղեցնել քաղաքացիա­կան ծառայության պաշտոններ:

Ներքին աուդիտի վարչությունն է «բազմացել», գրեթե եռապատկ­վել, 4 հաստիքի փոխարեն 11 աշ­խատող կա այստեղ: Պետն Իշխան Կարապետյանի կուրսեցի Արայիկ Քուրդյանն է: Աշխատողները բո­ղոքում են, որ նա «ՍԱՊԾ-ի Ստալինն» է: Նրա հիմնական ֆունկցիան հներից ազատվելն է: Պարզ չէ, թե ինչ իմաստ ունի ներքին աուդիտի այսք­ան բազմամարդ ստորաբաժանում ունենալը, եթե պետական հիմնարկ­ներում պարբերաբար ստուգումներ են անցկացնում ՀՀ վերահսկիչ պա­լատը, նախագահի և վարչապետի վերահսկողության ծառայությունները, ֆինանսների նախարարության տեսչությունը, Ազգային անվտանգու­թյունը»,-գրում է թերթը:

Մանրամասները՝ թերթի այսօրվա համարում: