Վճարիր 60 հազար դրամ և հանգիստ ծեծիր կնոջդ

Մինչև վերջերս հայտնի չէ, թե ինչ արժե կնոջը, կամ ընդհանրապես կին ծեծելը. այսօր արդեն պարզվել է, որ ինչպես ամեն ինչ այս աշխարհում, այնպես էլ կին ծեծլը գին ունի` 60 000 դրամ:

Եվ ով ցանկանում է ծեծել իր նախկին, ներկա կնոջը, ի դեպ ապագա կնոջը ծեծելը մի փոքր դժվար կլինի, ապա կա ֆիքսված գումար, որը մուծելով, կարող է հանգիստ և օրինական ձևով ծեծել:

Օրինակ Արարատի մարզում նախկին կնոջն ու զոքանչին ծեծելու մեջ մեղադրվող տղամարդը տուգանվել է ընդամենը 60 հազար դրամով:

Արարատի և Վայոց ձորի մարզերի ընդհանուր իրավասության դատարանն Ա.-ին մեղավոր է ճանաչել Քրեական օրենսգրքի 118-րդ հոդվածով նախատեսված երկու դրվագ հանցագործությունների կատարման մեջ և դատապարտել տուգանքի՝ 60 հազար դրամի չափով:

Ա-ն մայիսի 7-ին ժամը 22:00-ի սահմաններում նախկին կնոջ մոր կողմից տանից հեռանալու պահանջի հարցի շուրջ վիճաբանել է վերջինիս հետ և ծեծել նրան, ապա նաև նախկին կնոջը: Եվ սա առաջին դեպքը չէ դատարանում, որ կնոջը ծեծելու, սպանելու համար դատարանը թեթև պատիժ է որոշում հանցագործ տղամարդուն:

Իհարկե, հասկանալի է, թե նման դեպքերում ինչո՞ւ են որոշ դատավորների գրպաններն ու հաշվեհամարները միանգամից ուռչում, իսկ նման գործելաոճն հաստատ չի նպաստում ընտանեկան բռնությունների նվազմանը, և նաև այդ է պատճառը, որ բռնության ենթարկվող կանայք չեն դիմում համապատասխան օրգանների, քանի որ արդյունքում կանանց բաժին կհասնի քաշքշուկը: Չի բացառվում, որ մի բան էլ կանանց մեղադրեն բռնության նպաստելու համար, իսկ ընտանեկան խայտառակությունն էլ մյուս կողմից:

Կարևորը, որ գոնե որոշակի գին է որոշվել ծեծելու համար, թե չէ, տղամարդիկ ծեծում էին ու ոչ ժամ կար, ոչ արժեք և չգիտեին հատկապես, որ կին ծեծելն այդքան էժան է. ջրի գին: