«Հիմա կարո՞ղ եք ասել, ՀՀ-ում սեքս կա՞, թե՞ չկա․․․». Փաշինյանը՝ Տիգրան Մուկուչյանին

Ազգային Ժողովում Կենտրոնական ընտրական հանձնաժողովի 2016թ-ի տարեկան գործունեության հաշվետվության քննարկման ժամանակ «Ելք» խմբակցության ղեկավար Նիկոլ Փաշինյանը հիշեց հայտնի մի մեջբերում․ «Սովետական շրջանի ասացվածք կար, երբ պաշտոնապես հայտարարվել էր, թե Սովետական Միությունում սեքս չկա: Հիմա ձեր ասածով ստացվում է վարչական ռեսուսրի չարաշահում չկա»,- ասաց Փաշինյանը:

Նա իր հարցն ուղղեց ԿԸՀ-ի նախագահ Տիգրան Մուկուչյանին։

«Դպրոցի տնօրենն ի՞նչ կարող է անել. աշակերտի ծնողին կարո՞ղ է ցուցակում ներառել և դա անել աշխատանքի ժամին… ո՞րն է վարչական ռեսուսրի չարաշահումը, Ձեր ասած վարչական ռեսուսրի չարաշահումը կատվի է նման, ոնց գցում ես ոտքերի վրա է կանգնում»։

Տիգրան Մուկուչյանն էլ նշեց, որ կան երևույթներ, որոնք սահմանաված կարգով կարող է չարաշահում որակվել, բայց հանձնաժողովին ներկայացված թղթերում, որը գտնվել են անհայտ աղբյուրից, կամ աղբարկղից, հիմք չկար:

«Ես կարծում եմ՝ ներկայացվածի տիրույթում այլ բան հանձնաժողովը չէր էլ կարող անել, որևէ մեկին արադացնելու խնդիր դրված չէր, չէր էլ կարող լինել»,-ասաց նա:

Նիկոլ Փաշինյանն արձագանքեց․

«Երբ մենք ենք նայում՝ վարչական ռեսուրսի չարաշահում կա, երբ Դուք եք նայում՝ չկա․․․ Հիմա տեսողության հարց է: Հիմա կարո՞ղ եք ասել, ՀՀ-ում սեքս կա՞, թե՞ չկա, նկատի ունեմ ընտրակաշառքը և վարչական ռեսուսրի չարաշահումը։ Եթե ասեք չկա, մենք ի գիտություն կընդունենք»,-հարցրեց Փաշինյանը: