«Հակառակորդը գլուխը պատին էլ տա, ինչ էլ որ անի, վնասով է դուրս գալու». ազատամարտիկ

Հակառակորդը չի հաշտվում ստատուս-քվոյի հետ։ Այս մասին NEWSPRESS.am-ի հետ զրույցում ասաց նախկին քաղբանտարկյալ, ազատամարտիկ Ազատ Արշակյանը՝ անդրադառնալով վերջին օրերին սահմանին տիրող լարվածությանն ու կրակոցներին, որի հետևանքով քաղաքացիական զոհեր են եղել։

«Ադրբեջանը սադրանքների միջոցով ուզում է անպայման ստատուս-քվոն փոխել իր օգտին։ Կարծում եմ, որ ինչ քայլ էլ որ անեն՝ վերջում իրենց համար Սովետական միության հանցագործ որոշումները վերանայվում են։ Ղարաբաղյան հարցը հանցագործություն է եղել Բրեստ-Լիտովսկում՝ Մոսկվայի 1921թ․ կոնֆերանսում։ Այդ հանցագործությունն աշխարհը վերանայում է․ գնում է ռեաբիլիտացիա։ Հայ ժողովրդի, ինչպես նաև Արցախի ժողովրդի ռեաբիլիտացիայի շրջանն է հիմա․ հակառակորդը գլուխը պատին էլ տա, ինչ էլ որ անի, ինքը վնասով է դուրս գալու, եթե մենք շարունակենք ուժեղ լինել»,-ասաց Ազատ Արշակյանը։

Ըստ նրա՝ ոչ միայն առաջիկա օրերին, այլև նույնիսկ առաջիկա տարիներին էլ լայնամասշտաբ ռազմական գործողություններ չեն լինի, քանի որ կան անլուծելի շատ հարցեր։

«Ոչ մի բան չի լինի․ մենք ուժեղ լինենք՝ կմնա մեզ։ Թուլացանք՝ կկորցնենք»,-ասաց Արշակյանը։

Ինչ վերաբերում է ադրբեջանական կողմի հայտարարություններին, թե հայկական կողմի «սադրիչ գործողությունների հետևանքով զոհեր են ունեցել», Ազատ Արշակյանը նորմալ է համարում․ ըստ նրա՝ նման հայտարարություններ պետք է լինեին։

«Ադրբեջանցիները տարբերակներ են փնտրում՝ ստատուս-քվոն փոխելու համար։ Նրանք ուզում են վերադառնալ 19-րդ դարի վերջ, 20-րդ դարի սկիզբ․ օրացույցն ուզում են հետ տալ, բայց հայտարարություններով օրացույցը հետ չեն տա։ Այդ հայտարարությունները նույնն են, թե մենք ասենք՝ ուզում ենք վերադառնալ բոլշևիկյան իշխանության, մենք սիրում ենք բոլշևիզմը, իրենց հայտարարությունը դա է։ Մենք պե՛տք է ուժեղ լինենք, իսկ եթե թուլացանք, հանձնվեցինք․․․ դրա մասին չխոսենք․․․ Մենք չենք կարող ուժեղ չլինել, մենք այլ ելք չունենք, չպահել, նշանակում է՝ կործանվել․ պետք է պահենք»,- ասաց Ազատ Արշակյանը։

Աստղիկ Ստեփանյան