Ադրբեջանը փորձելու է մահմեդական աշխարհին տրամադրել ՀՀ–ի ու հայերի դեմ

Ադրբեջանը շարունակում է խախտել հրադադարի ռեժիմն` այս անգամ սեփական առաջնագծի բնակավայրերն ու այնտեղ բնակվող խաղաղ բնակչությանն օգտագործում, որպես կենդանի վահան։ Բաքուն ռազմակետեր, կրակակետեր է տեղակայում հենց բնակավայրերում`հետապնդելով մի քանի նպատակ։

Նախ`Ադրբեջանի ռազմա–քաղաքական ղեկավարությունը շատ լավ գիտակցում է, որ ԼՂՀ ՊԲ–ը երբեք թիրախային կրակ չի արձակում խաղաղ բնակչության, բնակավայրերի ուղղությամբ, ինչի մասին ևս մեկ անգամ այսօր հայտարարել է ԼՂՀ ՊԲ հրամանատար Լևոն Մնացականյանը, այլ պատասխան կրակ է արձակում միայն ռազմական օբյեկտների ուղղությամբ։

«Արցախի պաշտպանության բանակը երբևէ չի թիրախավորել խաղաղ բնակավայրերը, ինչպես հատուկ է մեր հակառակորդին, մեր հարվածի թիրախը եղել և, այսուհետ ևս, լինելու են միայն ու միայն այն ռազմակայանները, որտեղից թշնամին կրակային հարվածներ է հասցնում հայկական բնագծերին»,–նշել է Մնացականյանը:

Բաքուն այսօր խաղաղ բնակչության շրջանում զոհերին ներկայացնելու է «հայկական ագրեսիայի» արդյունք` սեփական հասարակության մոտ հայատյացությունը բարձրացնելով նոր մակարդակի վրա` ներքին լսարանի համար հրեշացնելով հայի կերպարը, ինչը նշանակում է, որ հաջորդ ռազմական ագրեսիայի դեպքում`մտնելով որևէ հայկական բնակավայր նրանք կրկնելու են այն, ինչ ժամանակին արվել էր Սումգայիթում, Բաքվում, Մարաղայում, ապրիլյան քառօրյա ժամանակ տարեց և անպաշտպան բնակիչների նկատմամբ Մարտակերտի շրջանում։
Երկրորդ`Ադրբեջանը միշտ էլ ղարաբաղյան հակամարտությունը փորձել է ներկայացնել, որպես քրիստոնյաների և մահմեդականների` «խաչի և կիսալուսնի» պայքար։ Օրերս գրանցված միջադեպը Բաքուն քարոզչական նպատակներով օգտագործելու է մահմեդական, թուրքական աշխարհին ՀՀ–ի, ԼՂՀ–ի, ընդհանրապես հայ ազգի դեմ տրամադրելու համար, ինչը հատկապես վտանգավոր է, եթե հաշվի առնենք հայերի ներկայությունը մի շարք մահմեդական երկրներում` Մերձավոր Արևելք, Իրան, Կենտրոնական Ասիա և այլն, բացի այդ հարևան Վրաստանում, որտեղ հայերն ու ադրբեջանցիներն անմիջական հարևաններ են` Քվեմո–Քարթլի շրջան, Թբիլիսի և այլն։

Հայերի «հրեշացման» քարոզչության շրջանակներում Բաքուն «արյունոտ» տեսարաններն ու զոհերի հուղարկավորությունը մաքսիմալ կերպով փորձելու է օգտագործել` դրա դեմ ՀՀ–ի դիվանագիտական ապարատը պետք է ակտիվորեն հակազդի, հակառակ պարագայում մահմեդական, թյուրքական աշխարհի երկրներում, որոնք առանց այն էլ վառ ադրբեջանամետ դիրքորոշում ունեն, Ղարաբաղի հարցը սկսելու է ընկալվել, որպես քրիստոնյաների պայքար մահմեդականների դեմ, ինչը կարող է հանգեցնել մի շարք երկրներում` Պակիստան և այլն, ջիհադի հայտարարմամբ ՀՀ–ի, հայերի դեմ` չպետք է մոռանալ, որ նույն Պակիստանը զինում է Ադրբեջանին, ՀՀ–ի հետ դիվանագիտական կապեր չի հաստատել , ճանաչել է այսպես կոչված «Խոջալուի ցեղասպանությունն» ու նրանց տարածքում են կենտրոնացել մի շարք ծայրահեղ իսլամիստական կազմակերպություններ, մզկիթներում տարվում է ակտիվ քարոզչություն`տարբեր նպատակներով։

Արտյոմ Բալասանով