Ազգային ժողովի Սևանա անեկդոտը

Նախօրեին Ազգային ժողովն առաջին ընթերցմամբ ընդունեց Սևանից հավելյալ 100 միլիոն խմ ջուր բաց թողնելու մասին օրինագիծը: Կողմ քվեարկեցին Հայաստանի Հանրապետական կուսակցություն, «Ծառուկյան» դաշինք, «Հայ Յեղափոխական Դաշնակցություն» խմբակցությունների 75 պատգամավորները: Դեմ քվեարկեցին «Ելք» խմբակցության 3 պատգամավորները` Արտակ Զեյնալյանը, Լենա Նազարյանը, Մանե Թանդիլյանը:

Պարզվում է՝ ԱԺ-ում այս քանի օրն ընկած հայ գյուղացի էին գովերգում, թե ինչպես Շարմազանովից սկսած մինչև Ջրպետկոմի նախագահ Արսեն Հարությունյանը մտածում են միայն գյուղացու հոգսը թեթևացնելու մասին:

Մեկ օրինակ՝ օրերս, երբ Արարատի մարզի Ջրաշեն գյուղում ծիրանի գնի հետ կապված քաշքշոց էր եղել, և որոշ լրատվամիջոցներ հայտնվել էին գյուղում, այդ ժամանակ գյուղի հարակից ջրատարը միանգամից ջրալցվել էր, լրագրողների հեռանալուն պես՝ անջատել էին ջուրը:

Այսպես էլ հայրենի ջրային համակարգն է, երբ պետք է՝ Սևանից ջուր են վերցնում, երբ պետք է՝ ոռոգման ջուր են տալիս, երբ պետք է՝ չեն տալիս ոռոգման ջուր։ Կարճ ասած՝ ոռոգման ջրի հարցը կախված է, թե հայ որոշ պաշտոնյաներ այդ օրը որերորդ ոտքից են արթնացել և հատկապես երազում ինչ են տեսել:

Իրականում երբեք էլ Սևանա ջրի բացթողումների հարցը կապված չի եղել ոռոգման ցանցի հետ, պարզապես յուրաքանչյուր պաշտոնյա իր ջրաղացին է ջուր տարել։ Լինելով ենթակա անձինք՝ ենթարկվել և ենթարկվում են հրահանգների, որոնք կարող են լինել տարբեր՝ ջրամբարներից միտումնավոր ջուր բացթողնելուց մինչև Սևանից լրացուցիչ ջրառը: Եվ դրա համար որևէ լուրջ հիմք հարկավոր չէ:

Արդեն քանի տարի է՝ ձյուն կա կամ չկա. նայած տարի, սակայն անձրևներ չեկան գարնանը, և ջուրը չհոսեց ջրամբարները։ Կարճ ասած՝ ջուր է պետք:

Իհարկե, եվրոպական կրթությունն ու դաստիարակությունը չեն ներում պարզապես ասել՝ Սևանի մակարդակն իջեցնել է պետք, քանի որ հարցեր ունենք լուծելու, ստիպված զբաղված են հորինվածքներով, որոնք, ի դեպ, այնքան հին են, որքան Նոյի տապանի պատմությունը և այնքան ծիծաղելի, ինչպես հայ որոշ պաշտոնյաների մտավոր հնարավորությունները:

Սակայն, թե′ պաշտոնյաների մտավոր հնարավորությունները, թե′ գյուղացիների «հոգսով» լացողները հասնելու են իրենց նպատակին, և ցավն այդ է. միշտ էլ Սևանա լճի հետ արել են այն, ինչ ցանկացել են և այժմ էլ անում են:

Ի դեպ, Ազգային ժողովի ընդդիմադիր պատգամավորները՝ կեղծ, թե անկեղծ, միահամուռ կողմ են քվեարկել Սևանա լճից լրացուցիչ ջրառին:

Ահա նման անդեմ երկիրը կառավարող համակարգ ունենալու ենք Սահմանադրական փոփոխություններով՝ 2018 թվականից: Լավ չէ՞ր նախկին համակարգը՝ գոնե մարդիկ գիտեին՝ ում հասցեին ինչ ասել, այսպես կարծիքները բաժանվելու են:

Իսկ անեկդո՞տը. Ինչպես բյուջեում փող կա միայն իշխանավորների համար, իսկ վարկերը չէին խանգարի, այնպես էլ ոռոգման համար ջուր կա, սակայն Սևանը դատարկել չէր խանգարի:

Ծիծաղելի չէ՞, սակայն այս է:

NEWSPRESS.am