Ծխախոտի արտադրման ծավալներն աճում են, ծխողների թիվը՝ նվազու՞մ

ՀՀ ազգային վիճակագրական ծառայության տվյալների համաձայն՝ 2017 թ․ հունվար-մայիսին Հայաստանում ծխախոտի արտադրությունը 2016 թվականի նույն ժամանկահատվածի համեմատ աճել է 18․2%։

Նախորդ տարվա նույն ժամանակահատվածում Հայաստանում արտադրվել է 8 մլն 304․4 հազար հատ սիգարետ, իսկ այս տարվա հունվար-մայիսին՝ 9 մլն 815․3 հազար հատ։ Արտադրված ծխախոտի որոշ մասն արտահանվում է։

Առողջապահության ազգային ինստիտուտի տնօրեն Ալեքսանդր Բազարչյանը NEWSPRESS.am-ի հետ զրույցում նշեց, որ ներկայումսծխող տղամարդկանց շրջանում նվազման միտումներ են նկատվում։

«Նվազման միտում կա 50 տարեկանից բարձր տարիք ունեցող տղամարդկանց շրջանում։ Սա պայմանավորված է նրանով, որ ծխախոտը մարդու առողջական վիճակի վրա սկսում է ազդել, և մարդիկ առողջական այդ վիճակից ելնելով՝ սկսում են թողնել ծխելը»,-ասում է Ալեքսանդր Բազարչյանը։

Հաշվի առնելով նախորդ տարիներին ծավալած գործունեությունն ու ծխախոտի օգտագործման դեմ կիրառված մեխանիզմները, մասնագետը նկատում է, որ դեռ ոչ մի արդյունք չկա։

Հիշեցնենք, որ ծխելու դեմ պայքարը սկսվել է դեռևս 2000-ականներից, և միայն 2017 թվականին ինչ-որ չափով նկատվում են նվազման միտումներ։ Ծխելն արգելող տարբերանշաններն ու որոշումները Հայաստանում, ըստ էության ուժ չունեն, կամ չեն գործում։ Ծխող մարդկանց կարելի է հանդիպել և՛ հասարալկական վայրերում, և տրանսպորտում, որտեղ իբրև թե արգելված է ծխելը։

Ամեն դեպքում, մի կողմից փորձում են նվազեցնել ծխողների թիվը, մյուս կողմից ծխախոտի արտադրման ծավալները գնալով աճում են։

Նկատենք, որ Հայաստանում 16 և բարձր տարիքային խմբում ծխախաոտի օգտագործման տարածվածությունը 50%-ից ավելի է, կանանց շրջանում 3-4%։ Ըստ վիճակագրական տվյալների՝ Հայաստանում 16 տարեկանից բարձր տղամարդկանց կեսից ավելին ծխող է, ինչը բարձր ցուցանիշ է համարվում։