Արմեն Ամիրյանն արձագանքել է Լևոն Բարսեղյանի հայտարարությանը

ՀՀ մշակույթի նախարար Արմեն Ամիրյանն արձագանքել է Ժուռնալիստների «Ասպարեզ» ակումբի նախագահ Լևոն Բարսեղյանի հայտարարությանը:

Այս առնչությամբ, Ժուռնալիստների «Ասպարեզ» ակումբի տարածած հաղորդագրության մեջ ասվում է.

«Ժուռնալիստների «Ասպարեզ» ակումբը հունիսի 27-ին հայտարարություն էր տարածել, որով հանրությանը և ՀՀ մշակույթի նախարարին տեղեկացրել էր, որ Հայաստանի պատմության թանգարան ՊՈԱԿ-ի տնօրեն Գրիգոր Գրիգորյանը, խախտելով «Տեղեկատվության ազատության մասին» ՀՀ օրենքը, թանգարանի մասին տեղեկություններ չի տրամադրում ակումբին (թանգարանային առարկաների ցանկը, ՊՈԱԿ-ի կառավարման խորհրդի կազմը, կանոնադրությունը, նիստերի արձանագրությունների պատճենները և կայացրած որոշումները, 2016 և 2017 թթ. բյուջեն, հաստիքացուցակը, պաշտոնատար անձանց անունները, ազգանունները, կրթությունը, մասնագիտությունը, պաշտոնը, աշխատանքի վայրի հեռախոսային համարները, էլեկտրոնային փոստի հասցեները և այլն):

Այսօր Ժուռնալիստների «Ասպարեզ» ակումբը տեղեկություն ստացավ նախարարությունից, որ նախարար Արմեն Ամիրյանը քննության է առել ակումբի հայտարարությունը, և «Հայաստանի պատմության թանգարանի տնօրեն Գրիգոր Գրիգորյանին հանձնարարել՝ ինչպես օրենքն է պահանջում, անպայման պատասխանել «Ասպարեզ» ակումբի խորհրդի նախագահ Լևոն Բարսեղյանի 2017թ. մայիսի 10-ին հղած գրավոր հարցման բոլոր կետերին։ Տնօրենը նախազգուշացվել է այսուհետ չխախտել դրա համար սահմանված ժամկետը»: