Հասմիկ Գաբրիելյանի կորուստը շատ նշանակալի է մեր ողջ հայ ազգի համար. Աշոտ Գրիգորյան

Եվրոպայի Հայկական Միությունների Ֆորումի նախագահ, «EU-ASIA Business Finance Centre» հոլդինգի նախագահ Աշոտ Գրիգորյանն իր ֆեյսբուքյան էջում շնորհակալություն  է հայտնել իր բոլոր ընկերներին ու մտերիմներին, կնոջ՝ Հասմիկ Գաբրիելյանի մահվան կապակցությամբ հղած ցավակցությունների համար:

Նա մասնավորապես գրել է.

«Ես հայտնում եմ իմ խորին շնորհակալությունը Facebook-ի իմ բոլոր ընկերներին իմ տիկնոջ Հասմիկ Գաբրիելյանի մահվան կապակցությամբ հղած ցավակցությունների համար:

Հասմիկ Գաբրիելյանը հանդիսանում էր իմ մարտական ընկերն ազեր-թուրքական ճակատում՝ հանուն հայ դատի մեր կողմից իրականացված ողջ պայքարի ընթացքում:

Ի շնորհիվ նրա կողմից տրված տասնյակ համերգների` մեզ հաջողվեց ոչ միայն Միջին Եվրոպայի երկրներում փառահեղորեն ներկայացնել հայ մշակույթը, այլև Սլովակիայի ԱԽ-ի անդամներին և կառավարության ղեկավարներին ներկայացնել, լուսաբանել հայոց ցեղասպանության արհավիրքը։Ահա այդ միջոցառումների շնորհիվ մենք կարողացանք ոչ միայն Սլովակիայի ԱԽ-ում հաստատել տալ հայոց ցեղասպանության փաստը, այլև առաջինը աշխարհում դրան օրենքի ուժ տալ:

Հասմիկ Գաբրիելյանը իսկապես մեծ երաժիշտ էր, փայլուն դաշնակահար, հազվագյուտ խորը արվեստագետ և անսահման մեծ հայրենասեր:

Ես ամբողջովին հասկանում և բարձր եմ գնահատում ցավակցողների անթիվ բազմությանը և իսկապես հավատում եմ նրանց մեծամասնության անկեղծ հայտարարությանը, որ ԵՀՄՖ-ի նախագահության անդամ և Սլովակիայի հայկական համայնքի փոխնախագահ, մեծ մտավորական Հասմիկ Գաբրիելյանի կորուստը շատ նշանակալի է մեր ողջ հայ ազգի համար:

Այժմ ԵՀՄՖ-ի նախագահությունը պիտի անի ամեն ինչ, որպեսզի մեր աշխատանքները չխաթարվեն՝ չնայած նրա՝ Հասմիկի բացակայությունն անվերականգնելի է:

Շնորհակալություն ևս մեկ անգամ այն հազարավոր անկեղծ, ջերմ և սփոփիչ արձագանքների համար, որոնք ես ստացա ողջ անցյալ շաբաթվա ընթացքում»:

ԵՀՄՖ-ի նախագահ
Աշոտ Գրիգորյան