Արարատի մարզի դատախազն ազատվել է պաշտոնից. Նա Կոստանյանի համակուրսեցին է

NEWSPRESS.am-ի տեղեկություններով՝ Արարատի մարզի դատախազ Համբարձում Մելիք-­Սարգսյանն ազատվել է պաշտոնից։

Նա եղել է նախկին դատախազ Գևորգ Կոստանյանի համակուրսեցին, ում շնորհիվ էլ փաստորեն, աստիճանաբար, առաջ է քաշվել և հայտնվել Արարատի մարզի դատախազի պաշտոնում։

Իր կարերիան Մելիք-­Սարգսյանն սկսել է Արմավիրից։ Այնուհետև նա տեղեփոխվել է Երևան քաղաքի Աջափնյակ և Դավթաշեն համայնքների դատախազություն՝ որպես քննիչ։ Ապա Գևորգ Կոստանյանն իր համակուրսեցուն, հավանաբար դեռ այն ժամանակ հեռանկարային ակնկալիքով, քաշել է իր թևի տակ՝ Հայաստանի Հանրապետության զինվորական դատախազություն, որտեղ նա այդ ժամանակ ղեկավարում էր։

Դրանից հետո Մելիք-­Սարգսյանը զբաղեցնում է Սևանի կայազորի զինվորական դատախազի պաշտոնը։ Իսկ արդեն 2013-ի նոյեմբերին, երբ Կոստանյանն իբր ոլորտը կարգավորելու համար «կադրային ջարդ» անվան տակ պաշտոններից ազատում էր մարդկանց ու դրանք բաժանում իր մտերիմներին, այդ պաշտոններից մեկը բաժին ընկավ նաև Համբարձում Մելիք­-Սարգսյանին։ Այդ կերպ Արդարադատության երկրորդ դասի խորհրդական Համբարձում Մելիք-­Սարգսյանը նշանակվեց Արարատի մարզի դատախազ։

Սակայն ինչպես պարզվեց, Գևորգ Կոստանյանի, այսպես ասած, թափը չբավականացրեց մտերիմներին իր նշանակած պաշտոններում պահելու համար։

Մեր տեղեկություներով՝ Համբարձում Մելիք­-Սարգսյանին հեռացրել են համակարգից։

Նա առաջին ամուսնությունից ունի 1 աղջիկ, իսկ երկրորդ ամուսնությունից 1 տղա և 1 աղջիկ։ Նրա հայրը՝ Գրիշա Համբարձումի Մելիք­-Սարգսյանը, ևս եղել է համակարգում, սակայն նրա մասին էլ արդեն խոսում են որպես նախկին դատավորի։