«Հայրն ինձ ասում է՝ կարա՞նք չզորացրենք»․ Պաշտոնյան նախարարին խնդրել է հիվանդ որդուն չզորացրել

Պաշտպանության նախարար Վիգեն Սարգսյանն անուններ չի տալիս, սակայն վստահեցնում է, որ այսօր շատ բարձր պաշտոններ զբաղեցնող անձանց տղաներ ծառայում են բանակում։

Նա այդ մասին ասաց լրագրողների հետ հանդիպման ժամանակ՝ նշելով, որ այդ տղաները ծառայում են նաև առաջնագծում:

«Լսե՛ք մի րոպե, ես ձեզ բա՛ն եմ ասում էլի․ նրանցից երկուսն ունեն զորացրման պարտադիր ցուցում, այսինքն առողջական խնդիր ունեն։ Բայց նրանց զորացրումը մենք չենք իրականացնում մի պարզ պատճառով՝ հենց զորացրումն իրականացնենք, դառնալու է, որ նա պաշտոնյայի զավակ է, դրա համար է զորացրվելու: Դուք պատկերացրեք էդ ընտանիքի վիճակը, որը չի միջամտել զորակոչի ժամանակ, մի տարի անցել է էդ զորակոչից, երեխան ծառայում է, ունի առողջական լուրջ խնդիր, պիտի զորացրվի, և հայրն ինձ ասում է՝ կարա՞նք չզորացրենք: Ես հասկանում եմ, որ դա իմ կողմից սխալ է, բայց նաև հասկանում եմ ծնողի համապատասխան միջնորդությունը»,-նկատեց Վիգեն Սարգսյանը։

Նա օրինակ բերեց նաև վերջին դեպքը, երբ հայտնի պաշտոնյաներից մեկի որդի դիմել է սպայական պատրաստման ծրագրին, որոշել է որպես սպա ծառայել: Նրան հարթաթության պատճառով չեն ներգրավել։

«Երրորդ կարգի հարթաթություն ուներ: Ես չարաշահել եմ իմ պաշտոնը, ասել եմ, որ երրորդ կարգի հարթաթաթությունը սպային պետք է չխանգարի առանձնապես, եթե ինքը այդքան վճռական որոշել է ծառայել», -ասաց նախարարը: