Այսօր կկազմակերպվի մոմավառություն՝ ԵՀՄՖ նախագահ Աշոտ Գրիգորյանի կնոջ` Հասմիկ Գաբրիելյանի հիշատակին

NEWSPRESS.am-ի նախաձեռնությամբ` այսօր հունիսի 28-ին՝ ժամը 19։00, Երևանի Սուրբ Սարգիս եկեղեցում տեղի կունենա մոմավառություն՝ ի հիշատակ Եվրոպայի Հայկական Միությունների Ֆորումի նախագահ, «EU-ASIA Business Finance Centre» հոլդինգի նախագահ Աշոտ Գրիգորյանի կնոջ՝ Հասմիկ Գաբրիելյանի։

Բոլոր ցանկացողները կարող են մեզ հետ միասին իրենց մասնակցությամբ հարգանքի տուրք մատուցել ԵՀՄՖ նախագահ Աշոտ Գրիգորյանի կնոջ հիշատակին։

Ավելի վաղ տեղեկացրել էինք․ որ երեկ՝ հունիսի 27-ին, ծանր հիվանդությունից հետո կյանքին հրաժեշտ է տվել ԵՀՄՖ-ի նախագահության անդամ, Սլովակիայի հայկական համայնքի փոխնախագահ, տաղանդավոր երաժիշտ և փայլուն դաշնակահարուհի Հասմիկ Հրաչյայի Գաբրիելյանը:

Նա ծնվել էր Գյումրիում 1955 թ. նոյեմբերի 27-ին: Ավարտել էր Երևանի Պետական Կոնսերվատորիայի դաշնամուրային ֆակուլտետը:

Համերգներով հանդես էր եկել Երևանում, Մոսկվայում, Սանկտ-Պետերբուրգում, Վիեննայում, Պրահայում, Բրատիսլավայում և այլ եվրոպական կենտրոններում:

Համարվում էր Յ.Ս. Բախի անզուգական մեկնաբան: Միջին Եվրոպայի երկրներում հանդես էր գալիս համերգներով՝ ծրագրում պրոպագանդելով հայ դասականների գործերը:

Հատկապես հիանալի մեկնաբանությամբ ներկայացնում էր Ա. Խաչատրյանի, Ալ. Հարությունյանի, Ա. Բաբաջանյանի, Գ. Հովունցի և այլոց հայտնի գործերը:

Հասմիկ Գաբրիելյանի համերգները վերածվում էին հայ մշակույթի կարևորագույն իրադարձությունների: Այդ համերգների և մշակութային միջոցառումների շնորհիվ Սլովակիայի պառլամենտի և կառավարության մեծ մասը ծանոթացավ հայոց ցեղասպանության փաստի հետ:

Հասմիկ Գաբրիելյանը մեկն էր, որ իր ամուսնու՝ ԵՀՄՖ-ի նախագահ Աշոտ Գրիգորյանի կողքին անմնացորդ պայքարեց հայոց ցեղասպանության բանաձևի ընդունման համար. 2004 թ. նոյեմբերին այդ պայքարն ավարտվեց փայլուն հաղթանակով և Սլովակիայի ԱԽ-ը հաստատեց հայոց ցեղասպանության շուրջ բանաձևը:

Հասմիկ Գաբրիելյանը մասնակից է եղել հայ դատի շուրջ մղվող ողջ անցուդարձին:

Ծնել և դաստիարակել է երկու հայրենասեր դուստրերին՝ Անի և Տաթևիկ Գրիգորյաններին, որոնք ստացել են փայլուն իրավաբանական կրթություն Անգլիայի ամենահեղինակավոր համալսարաններում:

Մինչև վերջին պահը Հասմիկ Գաբրիելյանը ապրում էր Հայաստանի խնդիրներով և անմնացորդ օգնում իր հայրենիքին:

Նրա հիշատակը կմնա պայծառ բոլոր նրան ճանաչողների սրտում: