Գրիգորյաններն իրենց բդեշխությունում աջուձախ լավություն են անում (լուսանկար)

Էջմիածնի կենտրոնական փողոցներից մեկի մայթեզրին` հին շենքերից մեկի տանիքին, նոր շինություն է կառուցվում։ Թե ում թույլտվությամբ և ինչ իրավունքով, չի քննարկվում։

NEWSPRESS.am-ի տեղեկություններով՝ շենքի վրա շենք կառուցելու մտահղացումը պատկանում է ոմն Ստեփան Ստեփանյանի, ով հանդիսանում է գեներալ Սեյրան Սարոյանի խնամին։

Իհարկե, գովելի է, երբ քաղաքը լցվում է նոր շենք ու շինություններով, որոնք ծառայում են հասարակությանը։ Սակայն դժվար է ասել, թե այս պարագայում որքանո՞վ այս շինությունը կարող է պիտանի լինել հասարակության համար։ Սա մի կողմից, մյուս կողմից էլ դժվար է ասել նաև, թե մեկ այլ պատվիրատուի դեպքում արդյո՞ք Էջմիածնի քաղաքապետ Կարեն Գրիգորյանը նույն սիրալիությամբ ու պատրաստակամությամբ կստորագրեր փաստաթղթերն ու շինարարության թույլտվություն կտար։ Այն էլ՝ այն դեպքում, երբ նույնիսկ ոչ մասնագետն անզեն աչքով կնկատի, որ իր ճարտարապետական դիրքով ու տեսքով նոր շինությունն ամենևին չի համապատասխանում հին կառույցի հետ։

Իհարկե, կա նաև մեկ այլ վարկած․ կարելի է ենթադրել նաև, որ Կարեն Գրիգորյանն, օրինակ, տեղյակ չէ այս շինարարության մասին և, ըստ էության, այն ապօրինի շինություն է․․․

Թեև սա, իհարկե, քիչ հավանական է, քանի որ Էջմիածինը գրաված Գրիգորյանների ընտանիքը հազիվ թե թույլ տար ինչ-որ մեկին, առանց իրենց իմացության, ինչպես ասում են, «բզբզար» իրենց տարածքում։

Ամեն դեպքում ապօրինաշինությո՞ւն է դա, թե՞ ունի օրինական թույլտվություն, NEWSPRESS.am-ը փորձեց ճշտել Էջմիածնի քաղաքապետարանի լրատվության բաժնի պետ Վարդան Վարդանյանից։

Վերջինս նախ պատասխանեց, թե տեղյակ չէ՝ ինչի մասին է խոսքը, ապա նշեց, որ նման շինություն կա, բայց ոչ թե մեր նշած վայրում, այլ մի այլ տեղ, հետո էլ շրջանցեց հարցն այն մասին, թե արդյո՞ք այդ շինարարության համար կա քաղաքապետարանի թույլտվությունը։

«Ես չգիտեմ, երևի․․․ վաղը կհարցնեմ, կիմանամ, կասեմ․․․»,-ասաց Վարդան Վարդանյանը։

Չստանալով նրանից որևէ հստակ տեղեկատվություն՝ փորձեցինք կապ հաստատել հենց Կարեն Գրիգորյանի հետ, ինչը, սակայն, արդյունք չտվեց, քանի որ վերջինս չպատասխանեց հեռախոսազանգերին։