Իշխանությունները պարզապես չեն ցանկանում «Նաիրիտը» գործարկել․ Աշոտ Գրիգորյան

NEWSPRESS.am-ի զրուցակիցն է Եվրոպայի Հայկական Միությունների Ֆորումի նախագահ Աշոտ Գրիգորյանը։ 

-Պարո′ն Գրիգորյան, «EU-ASIA Business Finance Center» հոլդինգը ստացա՞վ արդյոք ՀՀ կառավարության կողմից «Նաիրիտի» վերաթողարկման շուրջ պատասխանը։

-Միջազգային պրակտիկայում նման մրցույթի երբևիցե չենք հանդիպել, որի արդյունքները կազմակերպիչը չի ներկայացնում մասնակցին։ Ավելին՝ մենք բազմիցս դիմել ենք վարչապետ Կարեն Կարապետյանին՝ հայտնելով մեր պատրաստակամությունը շուտափույթ հանդիպելու, «Նաիրիտի» վերաթողարկման շուրջ պայմանավորվածություններ ձեռք բերելու հարցում, և մինչ այսօր ոչ մի արձագանք չենք ստացել։ Սա ավելի քան զարմանալի է։

Այն բարբաջանքները, որ «Նաիրիտի» շուրջ վերականգնման ոչ մի ծրագիր ոչ միայն Հոլդինգը չունի, այլև ընդհանրապես գոյություն չունի, անընդհատ արծարծվում է իշխանական մամուլի կողմից։ Այդ դատարկախոսներին ևս մեկ անգամ հայտարարում ենք՝ Հոլդինգն այս ծրագիրը ներկայացրել է կառավարություն, Ազգային ժողով և նաև մրցութային հանձնաժողովին։ ««Հալվա», «հալվա» ասելով՝ բերանը չի քաղցրանում», ասվում է տարածված արևելյան ասացվածքի մեջ․ որքան էլ փորձեք կեղծել և անընդհատ կրկնել վարչապետ Կարեն Կարապետյանի կատարած սխալը, այն է՝ Հոլդինգը չունի ծրագիր, վարկաբեկելու եք ձեզ, քանզի վարչապետն իր սխալն անելուց հետո Հոլդինգի կողմից ստացել է հստակ պատասխան։

Իսկապես, Կարեն Կարապետյանը սկզբում տեղյակ չէր եղել, որ կա չափազանց լուրջ կազմակերպված ծրագիր, որի համար կառավարությունը վճարել է անասելի հսկայական գումար՝ 300 000 դոլար, համաշխարհային հեղինակություն վայելող անգլիական «Յակոբս» ընկերությանը։ Այդ ծրագիրը վերամշակվել է հայ մասնագետների կողմից և Հոլդինգի փորձաքննության արդյունքում հավանություն է ստացել։ Ցավով պետք է նշեմ, որ մեր տպավորությունն այն է, որ իշխանությունները Հայաստանում արդյունաբերության զարգացման հարցում հետաքրքրություն չեն ցուցաբերում։

-Քիմիայի մասնագետների պահանջարկը շատ ցածր է, և որոշ ֆակուլտետներ և ուսումնական հաստատություններ փակվում են։ Արդյոք սա նշանակո՞ւմ է, որ «Նաիրիտի» հետ ոչ մի ապագա չեն ցանկանում կապել։

-Անկասկած, համամիտ եմ հարցադրմանը և պատճառն էլ կարող եմ նշել, չէ՞ որ «Նաիրիտի» աշխատակիցների ակտիվ խումբը դիմել է ՀՀ դատախազություն՝ «Նաիրիտի» շուրջ կատարված թալանի վերաբերյալ փաստերն արծարծելով։ Եթե հավատանք նրանց ներկայացրած փաստաթղթերին, ապա ՀՀ կառավարությունը՝ նախկին վարչապետ Տիգրան Սարգսյանի ղեկավարությամբ, կոնկրետ 35 մլն և 10 մլն գործարքների շուրջ պատասխանատվության պետք է ենթարկվի։ Համաձայն փաստերի՝ այն գումարներն արտահանվել են օֆշորային կազմակերպությունների հաշվին և լուրջ կոռուպցիայի մասին ահազանգ են պարունակում։ Բոլորիս խորին համոզմամբ՝ սա է այն կարևորագույն պատճառներից մեկը, ըստ որի՝ իշխանությունները և կոնկրետ երկրի նախագահը սարսափում են «Նաիրիտը» վերաթողարկելու մտքից․ իշխանությունները պարզապես չեն ցանկանում «Նաիրիտը» վերաթողարկել։

-Ի՞նչ է նախատեսում Հոլդինգը և եվրոպահայերի ֆորումը՝ այս հարցերի լուծումները տալու հարցում։

-Մենք նամակ ենք պատրաստել վարչապետ Կարեն Կարապետյանին Հոլդինգի անունից, որով արդեն քանիերորդ անգամ հայտնում ենք մեր պատրաստակամությունն անմիջապես Հայաստան ժամանելու և նրա հետ հանդիպելու համար։ Ըստ մեր ունեցած տեղեկատվության՝ «Նաիրիտը» սնանկ հայտարարելուց հետո կառավարիչն սկսել է գույքի վաճառք, ինչը չափազանց վախեցնում է մեր Հոլդինգի անդամներին։ Մենք սարսափով ենք սպասում, որ մեր հաջորդ այցի ընթացքում հայտնաբերենք գործարանի վերաթողարկման համար կարևոր տեխնոլոգիաների պակասը, որն այս շուտափույթ վաճառքի արդյունքում կարող է իրականացված լինել։ Մենք պահանջում ենք հրապարակել «Նաիրիտի» վերաթողարկման շուրջ մրցույթի արդյունքը և շուտափույթ բանակցությունների սեղանին նստել՝ Հոլդինգի հետ աշխատանքները կազմակերպելու պայմանով։ Եթե այս անգամ ևս մեր նամակը մնա անպատասխան, մենք կդիմենք Ազգային ժողովին՝ պահանջելով հարցը դնել քննարկման Ազգային ժողովում։