Կիպրոսի նախագահն այցելել է Մեծի Տանն Կիլիկիո կաթողիկոսարան

Մեծի Տանն Կիլիկո կաթողիկոսարան է այցելել Կիպրոսի Հանրապետության նախագահ Նիկոս Անաստասիատիս։ Նախագահի պատվիրակության կազմում էին Կիպրոսի Արտաքին, Ներքին, Տնտեսության և Զբոսաշրջության նախարարները, ինչպես նաև այլ բարձրաստիճան պաշտոնյաներ։ Այս մասին տեղեկացնում են Մեծի Տանն Կիլիկիո կաթողիկոսարանի լրատվական ծառայությունից:

Ն.Ս.Օ.Տ.Տ. Արամ Ա. Կաթողիկոսը, ողջունելով նախագահի այցելությունը, նշել է, որ մեր երկու ազգերը, եկեղեցիները և երկրները պատմական կապեր ունեն։

«Մեր երկու ժողովուրդների գործակցությունը հիմնված չէ տնտեսական շահերի վրա, այլ հավաքական արժեքների, սկզբունքների և ձգտումների վրա: Մենք հավաքական դատ ունենք: Կիպրական Դատ և Հայ Դատ։ Այս երկու դատերը նույն նպատակն ունեն՝ արդարություն, և նույն հասցեն՝ Թուրքիա։ Ցեղասպան նույն Թուրքիան մեր երկու ժողովուրդներին կոտորել է և արմատախիլ արել իր հողից։ Մենք պիտի շարունակենք միասին աշխատել միջազգային հանրության հետ, որպեսզի արդարություն լինի»,-ասել է Արամ Ա.-ն:

Նորին Սրբությունը նաև ողջունել է Կիպրոսի ու Հայաստանի միջև զարգացող տնտեսական ու դիվանագիտական կապերը։ Հայրապետն իր ջերմ գնահատանքն է հայտնել նախագահին՝ Կիպրոսի հայ համայնքին ցուցաբերած հատուկ հոգածության համար։

Կիպրոսի նախագահն անդրադարձել է երկու երկրների ժողովուրդների դարավոր բարեկամությանը, ինչպես նաև Հայաստանի ու Կիպրոսի միջև զարգացող գործակցությանը։ Նախագահը հիշեցրել է իր կատարած այցելությունը Հայաստան և ՀՀ նախագահ Սերժ Սարգսյանի այցելությունը Կիպրոս։ Նա ողջունել է Վեհափառ Հայրապետի կարևոր դերը միջկրոնական հարաբերություններում, ինչպես նաև նրա ցուցաբերած զորակցությունը կիպրական հարցին։

Վեհափառ Հայրապետն ու նախագահը ներկաների հետ այցելել են մայրավանքում գտնվող Սրբոց Նահատակաց մատուռ։ Այնտեղ Վեհափառ Հայրապետն աղոթք է արել սրբացած նահատակների աճյունների առջև: