«Թալիշի սադո» թերթի գլխավոր խմբագիր Հիլալ Մամեդովը կրկին ձերբակալված է

Քաղաքագետ Գագիկ Համբարյանը ֆեյսբուքյան իր էջում գրել է․

«Ադրբեջանական ԶԼՄ-ների տվյալներով, կրկին ձերբակալվել է «Թալիշի սադո» թերթի գլխավոր խմբագիր Հիլալ Մամեդովը… Turan գործակալությանն այդ մասին հայտնել է թալիշ մտավորականի եղբայրը՝ Սաբահադդին Մամեդովը… Ըստ վերջինիս, այսօր ժամը 11.30 նրանց տուն է այցելել թաղային ոստիկանը և առաջարկել նրան այցելել ոստիկանություն… Հետագայում, Հիլալաին հաջողվել է զանգահարել տուն և հայտնել հարազատներին, որ իրեն տանում են Բաքվի «Գյանջլիկ» մետրոյի կայարանի մոտ գտնվող ոստիկանական բաժանմունք, որտեղ, ըստ ադրբեջանական ԶԼՄ-ների, գտնվում է Ադրբեջանի ՆԳՆ-ի կազմակերպված հանցագործության դեմ պայքարի գլխավոր վարչությունը…

Հիշեցնեմ, որ սա Հիլալ Մամեդովի առաջին ձերբակալությունը չէ… Իլհամ Ալիևի վարչակարգը հատուկ ուշադրություն է դարձնում Մամեդովի ղեկավարած «Թալիշի սադո» թերթին, որին մեղադրում է ազգայնականության և հակաադրբեջանական քարոզչության մեջ… 2012 թ-ի հունիսի 21-ին Հիլալ Մամեդովը ձերբակալվել էր և դատապարտվել էր 5 տարի ազատազրկման…Նրան մեղադրել էին թմրամիջոցներ վաճառելու, ինչպես նաև դավաճանության մեջ… Սակայն բազմաթիվ միջազգային իրավապաշտպան և լրագրողական կազմակերպությունների, ինչպես նաև եվրոպական որոշ երկրների ղեկավարների հորդորներից հետո ապշերոնյան բռնապետը նրան 2016 թ․ մարտի 17-ին ազատ արձակեց…

Երևում է, Ադրբեջանում կրկին թափ է առնում բնիկ ժողովուրդների նկատմամբ հալածանքների նոր փուլը…»: