Ադրբեջանը միշտ էլ աշխատել է, որպեսզի լարվածությունն առաջնագծում պահպանվի․ Լևոն Մնացականյան

«Մենք բազմաթիվ փաստեր ունենք, որ Ադրբեջանն առաջնագծում ունեցել է կորուստներ, սակայն ոչինչ չի խոսվել այդ մասին: Այն, ինչ մենք բացահայտում ենք, ընդամենը եղածի մոտ 50 տոկոսն է»,-լրագրողների հետ հանդիպման ժամանակ ասել է ՊԲ հրամանատար գեներալ-լեյտենանտ Լևոն Մնացականյանը՝ հավելելով, որ Ադրբեջանը 2015թ․ մարտից որդեգրել է լրատվական մի քաղաքականություն՝ ընդհանրապես ոչ մի տեղեկություն չհրապարակել։

«Ադրբեջանական կայքերում կորուստների մասին ոչինչ չի հրապարակվում»,- ասել է նա և հիշեցրել, որ գտնվում են մի պատերազմում, որը դեռևս չի ավարտվել։

ՊԲ հրամանատարը շեշտել է, որ Ադրբեջանը միշտ էլ աշխատել է, որպեսզի լարվածությունն առաջնագծում պահպանվի, աշխատել է վնասներ հասցնել հայկական կողմին։ Հայկական կողմն  ամեն ինչ անում է, որպեսզի համարժեք պատասխան տա և նպատակահարմարությունից ելնելով վերջնական հակահարված տա։

Լևոն Մնացականյանն անդրադարձել է նաև ԵԱՀԿ համանախագահների այցին, նշել է, որ նրանց է ներկայացվելու իրավիճակը, հակառակորդ կողմից թույլ տված խախտումները և հակառակորդին տրված պատասխանները:

ՊԲ հրամանատարը խոսել է նաև սահմանային միջադեպերի հետաքննության մեխանիզմների ներդրման մասին, ապա հայկական կողմը միշտ էլ կողմնակից է եղել նման մեխանիզմների ներդրմանը:

«Ադրբեջանական կողմն է, որ ամեն առիթով աշխատել է, որպեսզի խոչընդոտի, բայց կարելի է ասել, այդ մեխանիզմները մեր կողմից ներդրվում են ու անհրաժեշտության դեպքում կօգտագործենք։ Համանախագահներն էլ են կողմնակից նման մեխանիզմների ներդրմանը»,- ասել է Լևոն Մնացականյանը։