Ռազմիկ Ամյանի վաստակը՝ ըստ Արմեն Ամիրյանի

Ռազմիկ Ամյանը հրաշալի երգիչ է և վաղուց էր արժանի վաստակավոր արտիստի կոչմանը: Այդ մասին, անդրադառնալով Հանրապետության նախագահի կողմից Ռազմիկ Ամյանին վաստակավոր արտիստի կոչում շնորհելուն և հասարակության բուռն արձագանքին, լրագրողների հետ զրույցում ասաց Մշակույթի նախարար Արմեն Ամիրյանը:

«Ես կարծում եմ՝ քննարկման առարկա դարձնել տաղանդավոր, շնորհաշատ և վաստակավոր, հանրության մեջ արդեն վաստակ ունեցող մարդու պատվավոր կոչումը, առնվազն կոռեկտ չէ»,- նշեց Ամիրյանը:

Դիտարկմանն ի պատասխան, թե արվեստի շատ գործիչների կարծիքով փոխվել է վաստակավորի կոչում շնորհելու ինստիտուստը, վարկաբեկվել է, օրինակ ունենալով նախորդ տարին, երբ վաստակավոր արտիստի կոչում շնորհվեց Արմենչիկին, Արմեն Ամիրյանը նկատեց. «Ես կարծում եմ, որ այն կոչումները, որոնք շնորհվեցին մայիսի 28-ին, բոլորն էլ արժանի էին, բոլորն էլ, ովքեր ստացան, այն մարդիկ էին, ովքեր իրավամբ ունեին վաստակ մեր մշակույթում:

Հարցին, թե ո՞րն է Ռազմիկ Ամյանի վաստակը, նախարարը հարցով պատասխանեց. «Դուք չգիտե՞ք: Ուրեմն դուք լավ չեք հետևում Ռամզիկ Ամյանի գործունեությանը: Ռազմիկ Ամյանը զարգացրել է կատարողական արվեստը և մեր կատարողական արվեստում բավականին լուրջ դերակատարում ունի: Նա հրաշալի երգիչ է, լավ ձայնային տվյալներով, և եթե այսօր երգիչները շեղվում են նախանշված ուղուց, այստեղ գալիս է հենց այն խնդիրը, որ պետք է մենք կարողանանք ստեղծել այն դաշտը, որ էստրադայում, դասական երաժշտության բնագավառում, փոփում, ջազում, մարդիկ մնալով իրենց ոճի մեջ, կարողանան դրամ վաստակել: Մեր ամբողջ խնդիրը հենց դա է. հայեցակարգերով, օրենքներով նշակել այն դաշտը, որ մարդիկ չգնան 6/8-ի դաշտը»:

Այդ դեպքում, ինչո՞ւ է ցավագին ընդունվում կոչումների բաշխման ընթացքը, հարցին էլ նախարարը կարճ պատասխանեց. «Որովհետև բոլորին թվում է, որ իրենք վաստակավոր են, բայց վաստակավոր են նրանք, ովքեր ստանում են»: