Տարոն Մարգարյանը խանդո՞ւմ է Շահեն Հարությունյանին

Երևանի քաղաքապետ Տարոն Մարգարյանը, քաղաքի ու քաղաքացիների բարեկեցությունն ապահովելու փոխարեն, իր բազում «այիբներին» ավելացրել է ևս մեկը։ Նա այժմ նոր «գործառույթ» ունի՝ քաղաքապետի պաշտոնի հետ այս անգամ «ստանձնել» է նաև «գործ տվողի» պարտավորությունը։ Կամ, այսպես ասած, Տարոն Մարգարյանը քաղաքապետից վերածվել է «գործ տվողի»։

Նրա թեթև ձեռքով՝ 18-ամյա Շահեն Հարությունյանին սպառնում է ազատազրկում։ Հիշեցնենք, որ «Հաց բերող» Արթուր Սարգսյանի մահից հետո, Երևանում զանգվածային միջոցառումներ կազմակերպելու համար, ընդդեմ Շահեն Հարությունյանի վարչական դատարան է դիմել ոստիկանությունը, որի «դաբրոն» տվել է Տարոն Մարգարյանը։ Կամ, պաշտոնական ձևակերպմամբ, Տարոն Մարգարյանը հաստատել է ոստիկանության հայցն ընդդեմ Շահեն Հարությունյանի։

Նկատենք, որ պատանի Շահենը 2013-ի նոյեմբերի 5-ի գործով արդեն իսկ 4 տարվա պայմանական ազատազրկման է ենթարկվել։ Այժմ Շահենին ուղարկվել է 5 վարույթ, որոնցից երկուսը, նախնական տվյալներով, ընդունվել է վերաքննիչ դատարան։ Ու եթե մյուսները ևս ընդունվեն, ապա Շահենը կարող է հայտնվել ճաղերի հետևում։ Ահա այսպես հեշտ ու հանգիստ խղճով քաղաքապետը որոշել է հաշվեհարդար տեսնել մի երիտասարդից, ով երկու ամիս առաջ, առանց իրեն զգուշացնելու, նստացույց ու խաղաղ երթ է կազմակերպել։

Իհարկե, չի քննարկվում այն, որ «Հաց բերող» Արթուրի մահից հետո կազմակերպված այդ ակցիաները եղել են ինքնաբուխ, որի դեպքում, քաղաքապետարանին տեղեկացնելու կարիք չի լինում։ Այլ կերպ ասած՝ ոչինչ անօրինական տեղի չի ունեցել։ Հատկապես երբ Շահենն ինքն է ասում, որ իրենց բոլոր քայլերն այդ ժամանակ համաձայնեցրել են ոստիկանության հետ և կարգազանց չեն եղել։

Բայց Տարոն Մարգարյանն իրեն հատուկ դրսևորմամբ, քնից զարթնել ու որոշել է՝ 18-ամյա պատանուն հարկավոր է պատժել։ Իհարկե, Մարգարյանը կարող էր ավելի վաղ դա անել, բայց հանգամանքները թույլ չէին տալիս․ չնայած այն բանին, որ նստացույցերն ու երթերը շարունակվել են 7 օր, սակայն, ոչ ոք այդ օրերի ընթացքում Շահենին ու նրա ընկերներին չի զգուշացրել դադարեցնել ակցիան, մինչև նրանք իրե՛նք չեն դադարեցրել այն։

Եթե անօրինական էր, ապա ինչո՞ւ այն ժամանակ պարոն քաղաքապետը չէր զբաղվում խնդրով։ Թե՞ առջևում ընտրությունների էին, և մի կողմից զբաղված էր նախընտրական սուտ խոստումներով, մյուս կողմից՝ նա մտավախություն ուներ, որ Շահենի դեմ հայց ներկայացնելն ու նրան դատի տալը պարզապես սև բիծ կլիներ իր ու Հանրապետականի չեղած վարկանիշի վրա։

Տարոն Մարգարյանն այսօր մի ստորագրությամբ «ոչնչացնում» է հասարակության համար վտանգ չներկայացնող, ավելին՝ ի տարբերություն իրեն, այդ հասարակության ճակատագրով մտահոգված ու նույն հասարակության համար կանգած պատանուն։ Շահեն Հարությունյանն իր այս պայքարն սկսել է դեռ 14 տարեկանից՝ կանգնելով իր հոր՝ Շանթ Հարությունյանի կողքին ու մնալով նրա գործին անդավաճան։ Ու չի բացառվում, որ Տարոն Մարգարյանի մեջ խոսում է նաև խանդը, քանի որ, որպես այդպիսին, ինքը իր հոր՝ Անդրանիկ Մարգարյանի արժանի հետնորդը այդպես էլ չդարձավ։

NEWSPRESS.am