«ՀԺ». Քաղաքապետարանը ստել է. Տարոն Մարգարյանն ընդդեմ Սամվել Կարապետյանի

«Հայկական ժամանակ» թերթը գրում է.

«Մայիսի 23-ին Երևան քաղաքի Գլխավոր պողատայի և Սարյան փողոցի հատման մասում՝ Բուզանդի 101 հասցեում, շինաշխատանքների ժամանակ ծառեր էին հատվել: Ականատեսները դիմել էին Երևանի քաղաքապետարան և ոստիկանություն՝ ծառահատման դեպքով ենթադրյալ մեղավորներին պատասխանատվության ենթարկելու նպատակով:

Տվյալ այգում այժմ էլ ընթանում է բարեկարգման աշխատանքներ: Բարեկարգումը պատվիրել է «Նոր Երևան» սահմանափակ պատասխանատվությամբ ընկերությունը, իսկ կապալառու կազմակերպությունը «Դակշին» ՍՊԸ-ն է:

Քաղաքապետարան ահազանգած քաղացին՝ Արման Գաբրիելյանն, իր ֆեյսբուքյան էջում հրապարակել էր հատված ծառերից լուսանկարներ և հայտնել. «Բուզանդ 101 հասցեում ծառեր են հատել, մեր ահազանգով եկան ոստիկաններ ու Կենտրոն կանաչապատումի ներկայացուցիչը: Պարզվեց, «Տաշիր գրուպ»-ը թույլտվություն ունի կենտրոնում այգի կառուցելու-կանաչապատելու, նաև ծառի ճյուղեր կտրելու թույլտվություն ունեն, սակայն ծառ հատելու թույլտվություն չունեին: Հատել են 2 ծառ»: Նույն օրը «Հետք» էլեկտրոնային պարբերականն անդրադարձել է ծառահատման դեպքին և պարզաբանում ստացել Երևանի քաղաքապետարանից: Կայքին Երևանի քաղաքապետարանի տեղեկատվության և հասարակայնության հետ կապերի վարչությունից հայտնել էին, որ բնապահպանության վարչությունը պարզել է, որ ծառահատումն իրականացվել է առանց համապատասխան թույլտվության, այդ իսկ պատճառով գործն ուսումնասիրվում է իրավապահների կողմից:

Armtimes.com-ը խնդրի վերաբերյալ երեկ դիմել էր Երևանի քաղաքապետարան, որտեղից հայտնեցին, թե բնապահպանության վարչությունը դեպքն արձանագրելուց հետո նյութերն ուղարկել է ՀՀ բնապահպանության նախարարության բնապահպանական պետական տեսչությանը վարչական վարույթ իրականացնելու համար:

Մեր հարցերին ի պատասխան նախարարության բնապահպանական պետական տեսչությանից հայտնեցին, որ «Հետք»-ի հրապարակման հիման վրա տեսչության Երևանի տարածքային բաժնի ներկայացուցիչները գնացել են տեղազննության և պարզել են, որ հատված ծառերը ոչ թե երկուսն են այլ, ավելի շատ: Նրանց հենց տեղում «Նոր Երևան» ՍՊԸ-ի կողմից տեղեկանք է տրվել, որ ծառերը հատելու թույլտվություն ունեցել են: Նախարարությանը տրամադրել են նաև համապատասխան եզրակացությունը, որտեղ շարադրված է, թե որ ծառերը պետք է հատվեն:

«Նոր Երևան» ՍՊԸ-ի տնօրենը տեսչությանը ներկայացրել է մի փաստաթուղթ, որտեղ Երևանի քաղաքապետարանի աշխատակազմի բնապահպանության վարչության պետը «Դեֆի» ՍՊԸ-ի տնօրեն Գ. Բարոյանին («Նոր Երևան» ՍՊԸ-ի ներկայիս տնօրենին) տեղեկանք է տրամադրել դեռևս 2015 թվականին, որ բարձր որոկավորմամբ մասնագետների տրամադրած եզրակացության հիման վրա հատման ենթակա ծառերի հատումը նպատակահարմար է իրականացնել դեկտեմբերի 8-ից հետո: Այսինքն՝ քաղաքապետարանն այն ժամանակ արդեն իսկ տեղյակ էր, որ տվյալ այգում հատման ենթակա ծառեր կան, տեղյակ էր, որ «բարձր որակավորում» ունեցող մասնագետները հատելու եզրակացություն էին կազմել և ավելին՝ այդ եզրակացության հիման վրա քաղաքապետարանը թույլվություն էր տրամադրել»:

Մանրամասները՝ թերթի այսօրվա համարում