Ֆեոդալաճորտատիրական կարգեր հաստատած Գրիգորյանները փորձում են պահել իրենց «պատիվը»

Էջմիածնի քաղաքապետի ընտրություններից առաջ տեղի ունեցած՝ բռնությամբ կրակոցներով զուգորդված հայտնի միջադեպի գործով դատական քննությունը շարունակվում է։ Հարցաքննվել են տուժողներից Արթուր Թումանյանը։ NEWSPRESS.am-ի հետ զրույցում Արթուր Թումանյանի փաստաբան Արմինե Հարությունյանը նշեց, որ տուժողն ամբողջովին պնդել է իր նախաքննական ցուցմունքները, ինչը չի կարող ասել գործով մյուս տուժող Ստեփան Աբգարյաի մասին։

Արմինե Հարությունյանի խոսքով՝ նա արդեն մի քանի դատական նիստի չի ներկայացել՝ տարբեր պատճառաբանություններով, այն է, թե՝ քաղաքից բացակայում է, կամ, օրինակ, ծանուցված չի եղել։ Թե ինչով է պայմանավորված Ստեփան Աբգարյանի նման վարքագծի դրսևորումը՝ Արթուր Թումանյանի փաստաբանը դժվարանում է ասել՝ նշելով, որ այս հարցին իրավասու է պատասխանել Աբգարյանի փաստաբան Միհրան Պողոսյանը։

«Մեր և դատարանի տեսանկյունից դիտարկելը մի բան է, իրական պատճառները քննարկելը՝ այլ բան։ Այս գործով մեկ վկա կա՝ Ստեփան Աբգարյանի հայրը՝ Սիմոն Աբգարյանը, ով մասնակցել է դատական նիստերին ու պատասխանել որոշ հարցերի՝ ամեն անգամ տալով խուսափողական պատասխաններ»,-ասում է Արմինե Հարությունյանն ու բացատրում, որ Սիմոն Աբգարյանը հակասությունների մեջ է մտել իր կողմից տված նախնական ցուցմունքների հետ։

Պարզվում է, որ նա նախ նկարագրել է ծեծկռտուքի հետ կապված դեպքի մանրամասներ, ըստ որոնց՝ լսել է աղմուկ, դուրս եկել և իր տղային ասել, թե իր բանը չի հորդորել է նրան տուն մտնել։ Այս ցուցմունքի ժամանակ հայր Աբգարյանը նշել է նաև, որ նկատել է հստակ դեմքեր, ճանաչել նրանց։ Մասնավորապես, նա վեճի բռնվածների մեջ ճանաչել է գեներալ Մանվել Գրիգորյանի որդիներին՝ Էջմիածնի քաղաքապետ Կարեն Գրիգորյանին և նրա եղբորը։

Ավելի ուշ Աբգարյանը հերքել է ինքն իր տված ցուցմունքն ու նշել, թե իբր Կարենին ու նրա եղբորը տեսել է ոչ թե ինքը, այլ հարևանները, և իբր հենց նրանց խոսքի հիման վրա հիմնվելով էլ տվել է իր նախնական ցուցմունքը։ Իսկ իրականում իբր շատ մութ է եղել, և ինքը ոչ ոքի չի ճանաչել։ Ավելին, Ստեփան Աբգարյանն ակնհայտորեն դժկամությամբ է պատասխանել հարցերին և խնդրել է, որ իրեն այլևս հարցեր չտան։

«էսքանը հերիք ա, էլ հարցեր մի՛ տվեք․․․»,-այս և նման արտահայտություննեն ու Աբգարյանի կտրուկ կերպարանափոխությունն առիթ են տվել մտածելու, որ Գրիգորյանների կողմից նրանց վրա ճնշումներ են եղել։

Իհարկե, այս և շատ ուրիշ հարցերի պատասխաններ փորձեցինք ստանալ Աբգարյանի փաստաբան Միհրան Պողոսյանից, ով մեզ հետ զրույցում նշեց սակայն, որ երկրում չէ, և գործի հետ կապված հարցերին կպատասխանի, երբ վերադառնա։

Մեզ հասած լուրերի համաձայն՝ Էջմիածին քաղաքում, ուր այս ծեծկռտուքի մասին տեղյակ են գրեթե բոլորը, ոչ ոք չի փորձում վկայություն տալ ու հայտնվել Գրիգորյանների «ճիրաններում»։

Ֆեոդալաճորտատիրական բարքերով իշխանություն հաստատած քաղաքի բնակիչներն ապրում են վախի մթնոլորտում։ Այս իրավիճակում դժվար է ասել, թե ինչ ընթացք կստանա դատական նիստը, եթե այն անցնի Գրիգորյանների ճնշման ներքո։ Ակնհայտ է, որ «հարայ-հրոցով», աղմուկ աղաղակով ու զենքի ուժով Էջմիածնում իրենց լեգիտիմ իշխանությունը հաստատած Գրիգորյանները, որպես ֆեոդալ, թույլ չեն տա ճորտերին ցուցմունք տալ իրենց դեմ, և առավել ևս թույլ չեն, տա, որ ինչ-որ դատարան, հանուն արդարության, խաղա իրենց «պատվի» հետ, եթե իսկապես ունեն պատիվ։