Կառավարությունը հերթական անգամ փորձում է թոզ փչել ԱՄՆ դեսպանատան վրա

Կառավարության այսօրվա նիստում հաստատվել է «Կոռուպցիայի կանխարգելման և կոռուպցիայի կանխարգելման հարցերով մարմնի մասին» և հարակից օրենքներում փոփոխություններ ու լրացումներ կատարելու փաթեթը։ Նախատեսվում է Բարձրաստիճան պաշտոնատար անձանց էթիկայի հանձնաժողովի հենքի վրա ստեղծել կոռուպցիայի կանխարգելման հարցերով մարմին, որն իրականացնելու է կառուպցիայի կանխարգելման, այդ թվում՝ էթիկայի, շահերի բախման, անհամատեղելիության պահանջների, բարձրաստիճան պաշտոնատար անձի և հանրային ծառայողի նկատմամբ կիրառվող այլ սահմանափակումների պահպանում։ Մարմինն օժտված է լինելու պատժամիջոցների կիրառման կարողությամբ, նախագծի համաձայն, հայտարարագիր պետք է ներկայացնեն նաև այն հանրային ծառայողները, որոնք թեև բարձրաստիճան դիրք չեն զբաղեցնում, սակայն, իրենց գործունեությամբ պայմանավորված, գտնվում են ռիսկային գոտում։ Այդ անձինք են գնումների գործընթացում ընդգրկված պաշտոնյաները, քննիչները, դատախազները:

Թեև կոռուպցիայի կանխարգելմանն ուղղված այս նախագիծն առանձնապես միտված չէ կոռուպցիան բացահայտելուն, սակայն կառավարության նիստի ժամանակ շատերին անհանգստացրել է. բոլորն էլ զգուշանում են։

Կարող է պատահել, որ այս կամ այն մեծարժեք և անբացատրելի նվիրատվությունը ներկայացնեն կոռուպցիա: Սակայն, ինչպես երևում է նախագծից, այն դժվար թե կոռուպցիան բացահայտելու համար է, միայն ավելացել է ռիսկային գոտում գտնվող անձանց հայտարարագիր տալու մասին դրույթը:

Ի դեպ, Էթիկայի հանձնաժողով մինչ այս բարձրաստիճան պաշտոնյաները ներկայացնում էին իրենց հայտարարագրերը՝ կիսատ-պռատ և հատկապես չէին խորշում ներկայացնել հաճախ միլիոնների հասնող նվիրատվություններ: Եվ ոչ ոք պաշտոնյաներին չի հարցրել, թե ձեզ որտեղի՞ց այսքան գումար, երբ ձեր աշխատավարձը ձեր ունեցվածքի փոքր մասն է: Եվ մինչև Էթիկայի հանձնաժողովը չի պահանջելու բացահայտել հարստության աղբյուրը, կոռուպցիայի դեմ պայքարելու ուղղությամբ բոլոր միջոցառումները և պարզապես թուղթ լրացնելու համար են:

Այս նախագիծն ԱՄՆ դեսպանատան աչքերին թոզ փչելու համար է, քանի որ նրանք հետևում են Հայաստանում հակակոռուպցիոն գործընթացներին և գիտեն կոռուպցիոն շարժն ինչպես է տեղի ունենում, սակայն մինչև Հայաստանի իշխանությունները չպայքարեն կոռուպցիայի դեմ, դեսպանատունը կսահմանափակվի միայն հայտարարություններով, կոչերով և կսահմանափակի ֆինանսական ռեսուրսները:

Դեսպանատունն սպասում է, թե երբ Հայաստանի իշխանությունները միլիոնատեր-պաշտոնյաներից կհարցնեն՝ Ձեզ որտեղի՞ց այս հարստությունը և պատասխան չունեցողները կհայտնվեն իրավապահների ուշադրության կենտրոնում, և ահա այդ ժամանակ էլ կսկսվի պայքարը, իսկ կոռուպցիայի դեմ պայքարում արդարադատության նախարարության առաջարկած լրացումներն ու փոփոխությունները ծաղկող կոռուպցիան լղոզելու միջոց են:

NEWSPRESS.am