Վոլոդյա Ավետիսյանն ազատ արձակվելուց հետո նստացույց է սկսել կառավարության շենքի մոտ

Այս իշխանություններից պետք է ազատվել։ Այսօր կառավարության դիմաց հայտարարեց ազատամարտիկ Վոլոդյա Ավետիսյանը, ով 3 տարի 8 ամիս անազատության մեջ էր և այսօր ազատ է արձակվել։ Նա կալանավայրից անմիջապես եկել էր կառավարություն և նստացույցի միջոցով փորձում է իր դժգոհությունը հայտնել իշխանությունից։

Ազատամարտիկը լրագրողների հետ զրույցում նշեց, որ ամբողջ ազգը պետք է պայքարի կանգնի, որպեսզի շոշափելի արդյունք լինի։ Վոլոդյա Ավետիսյանն իր ընտրած պայքարի միջոցը դիտարկում է որպես «ազգի փրկություն»։

«Ազատամարտիկների համար պայքարում ենք՝ խնդիր կա, խաղաղ պայմաններում զոհված զինծառայողների համար պայքարում ենք՝ խնդիր կա․․․ բայց տենց ոլորտ կա՞, որ խնդիր չլինի։ Եկել եմ այստեղ՝ իմ բողոքը հասցնելու պատկան բռնապետերին, հայ ժողովրդին, որ հելնեն ու պայքարեն էս իշխանության դեմ»,- նշեց Վոլոդյա Ավետիսյանը։

Պատասխանելով հարցին, նա նաև անդրադարձավ Պաշտպանության նախկին նախարար Սեյրան Օհանյանի՝ իրեն ընդդիմություն հռչակելու հարցին։ Չնայած այն բանին, որ բազմաթիվ ազատամարտիկներ նախընտրական շրջանում միացան Օհանյանին, սակայն, Վոլոդյա Ավետիսյանի կարծիքով, այդ շարժումը չէր կարող արդյունք ունենալ։

«Սեյրան Օհանյանը չի կարող ընդդիմություն լինել։ Մեր հայ զինվորների համար Սեյրան Օհանյանն է պատասխան տալու, այդ պատասխանատվությունից նա չի ազատվել․․․ նա մնում է որպես իշխանություն»,-ասաց ազատամարտիկը։

Առաջիկա իր անելիքները նա համեմատում է առվակի հետ։

«Եթե փոքր առվակի հունը բացեն, նա առաջ կգնա, եթե ոչ՝ կմնա և կհոտի։ Հիմա ես սկսել եմ, բոլոր ցանկացողները կարող են գալ և ինձ միանալ։ Ժողովուրդն ա որոշելու՝ կհեռանա՞ իշխանությունը, թե՞ ոչ»,-ընդգծեց Վոլոդյա Ավետիսյանը՝ հավելելով, որ այսօր որպես ժողովրդին առաջնորդող ուժ չի տեսնում։

«Ո՞վ պետք ա առաջնոդի՝ ԲՀԿ-ն, որ իշխանության հետ ա նստում-վեր կենում, թե՞ Դաշնակցությունը։ Ինչ վերաբերում է ԵԼՔ-ին՝ ժամանակը ցույց կտա»,-նշեց ազատամարտիկը։

Նա կառավարության շենքի մոտ բարձրախոսով հայտարարեց․ «ՀՀ-ն Արդարադատության նախարար ունի՞, թե՞ չէ: Ինձ դատապարտել են, նստել եմ, թող գան ու պատասխան տան: Երկու տարի գերի եմ եղել, վաղաժամկետ կարող էի ազատվել, չազատեցին: Իսկ իրենք խոսում են օրենքներից, առանց ամաչելու ազգի առաջ սուտ են խոսում, սուտասան են»:

Վոլոդյա Ավետիսյանը հայտարարեց, որ չի դադարեցնելու նստացույցը, նրա պահանջը հետևյալն է՝ կա′մ իշխանությունները երկիրը շատ արագ պետք է օրենքի երկիր դարձնեն, կա′մ էլ հեղափոխություն պետք է լինի:

Նրա խոսքով՝ այսօր Հայաստանը խնդիր ունի լինել-չլինելու․«Ես մեր երեխաների ապագայի համար եմ անում սա»,-եզրափակեց ազատամարտիկը։