Արարատի մարզում ավարտվում է Աբրահամյանների դարաշրջանը

Այսօր վարչապետի որոշմամբ աշխատանքից ազատվել է Արարատի մարզպետարանի աշխատակազմի ղեկավար Արմեն Մարգարյանը։ Առանձնապես ոչինչ չասող տեղեկություն է։ Սակայն օրվա ընթացքում կծիկը շարունակեց քանդվել՝ ինչպես սպասվում էր, Արտաշատի քաղաքապետ Արգամ Աբրահամյանը հրաժարական է ներկայացրել։ Նա հետայսու աշխատելու է Ազգային ժողովում՝ որպես պատգամավոր։

Նշենք, որ վերջերս աշխատանքից ազատվել է նաև Արարատի մարզի Մխչյան գյուղի դպրոցի տնօրեն Աննա Ավագյանը՝ իր դիմումի համաձայն, իսկ իրականում ԱԺ ընտրություններում սատարել էր Արգամ Աբրահամյանին, ինչն իհարկե, չի ներվել նրան․ ՀՀԿ-ական մարզպետն Աննա Ավագյանին ազատել է աշխատանքից, քանի որ, ի թիվս այլ «մեղքերի», նա Աբրահամյանների ազգականուհին է։

Գաղտնիք չէ, որ մարզպետ Արամայիս Գրիգորյանն Աբրահամյաններից ամեն կերպ ցանկանում է ազատվել։ Չար լեզուներն ասում են, որ դա նաև ՀՀ իշխանական վերնախավի «դաբրոյով» է նաև։

Հիշեցնենք, որ այս օրերին Հովիկ Աբրահամյանը քաղաքական «կենդանության» նշաններ էր ցույց տալիս, սակայն ԶԼՄ-ներով արտահայտած ցանկությունը՝ ԱԽՔ նշանակվելու վերաբերյալ՝ հենց ԶԼՄ-ներով մերժվեց․ Հովիկ Աբրահամյանին ոչ ոք Ազգային անվտանգության քարտուղարի պաշտոն չէր առաջարկել։

Կարծես թե Արարատի մարզում ավարտվում է Աբրահամյանների 20-ամյա դարաշրջանը, իհարկե, նրանք առանց կռվի չեն հանձնվի, սակայն փաստ է, որ անգամ մխչյանցի տարբեր մեծ ու փոքր պաշտոնյաներից են փորձում ազատվել։

Արգամ Աբրահամյանի՝ պատգամավոր դառնալուց հետո ինքնաբերաբար մարզը դատարկվում է Աբրահամյաններից․ պակասում են նրանց վարչական լծակները, մնում է միայն հեղինակային ազդեցության իրավունքը, որը խարխուլ հող է իշխանությունը մարզում պահելու համար։

Հովիկ Աբրահամյանի վերջին հույսը մնացել է որդին, քանի որ ովքեր կարող էին փախչել Աբրահամյաններից, արդեն փախչում են, ովքեր սատարում էին, արդեն գործազուրկ են։

Խոսակցություններ կան, որ խնամիների հարաբերություններն իդեալական չեն, հատկապես «բամփելու» պատմությունից հետո։ Իհարկե, այս իրավիճակը դեռ չի նշանակում, որ Հովիկ Աբրահամյանը զենքերը վայր է դրել, սակայն այս անգամ ի՞նչ է ծրագրել՝ մոխիրներից հառնելու համար, վաղ թե ուշ պարզ կլինի։ Նա կարիերա ստեղծեց ավտովերանորոգման կետից, նախկին վարչապետի, նախկին ԱԺ նախագահի կարգավիճակից հաստատ ինչ-որ բան կմոգոնի։ Իսկ մինչ այդ, Աբրահամյանները կորցնում են իրենց ազդեցությունը մարզում։

NEWSPRESS.am