Բիզնեսին հարգեք, պարոնա՛յք, բիզնեսի՛ն. վարչապետ

Նախօրեին վարչապետ Կարեն Կարապետյանը Բնապահպանության նախարարությունում էր, նա լսել է նախարարի հաշվետվությունը ոլորտի վերաբերյալ և ցուցումներ տվել:

Հետաքրքրական է այն, որ նախ շեշտել է հարգանքը բիզնեսի նկատմամբ, հետո մնացածը. կարևորը բիզնեսը չտուժի: Ինչպես գիտենք, այս տարիներին բնապահպանության մեջ արմատներ գցած բիզնեսը երբևէ չի տուժել, այլ բարգավաճել է պետության ու բնական ռեսուրսների հաշվին և այժմ էլ է:

Վարչապետը ոլորտում ոչինչ նոր չի ասել, եթե նախկինում շեշտվում է, որ ընդերքը պետք է օգտագործել, սխալ է այն չօգտագործելը, այժմ վարչապետն այդ ամենին գումարած հարգանք է պահանջում բիզնեսի հանդեպ:

Օրինակ՝ ձկնաբուծարաններ տարիներով թալանել են Արարատյան դաշտի ստորգետնյա ջրային ավազանը՝ դաշտը հասցնելով անապատացման: Եթե նախկինում հանրությունը փորձում էր նրանց ախորժակը սահմանափակել, ապա այսօր վարչապետը հարգանք է պահանջում բիզնեսի հանդեպ:

Ինչպես գիտենք, մեր երկրում օրինավոր բիզնես չկա, եթե այս կամ այն մեծահարուստ որևէ ռեսուրս է ձեռք գցում, ապա դա ոչ թե վերածում է բիզնեսի, այլ թալանի: Չէ՞ որ բիզնեսի այս կանոններին Կարեն Կարապետյանը հրաշալի ծանոթ է, տարիների շարունակ, այսօր էլ «Գազպրոմ Արմենիան» զբաղված է Հայաստանում նմանատիպ բիզնես անելով: Եթե «Գազպրոմը» չի կարողանում օգտագործվող գազից թալանել` թալանում է գազի որակի միջոցով, թալանում է կասկածելի հաշվիչների միջոցով, ի վերջո թալանում է օրինականորեն՝ սահմանի գազը կրկնակի վաճառելով ժողովրդին: Ահա այսպիսի բիզնեսին է հրահանգում հարգել Կարեն Կարապետյանը:

Ինչ վերաբերում է Սևանին. նախկին իշխանավորները սիրում էին Սևանա լիճ, բայց դե թալանում էին ինչպես պատահի՝ մեկը ջուրն էր տանում, մեկը թունելի վերանորոգման հաշվին էր հարստանում, մյուսը ՀԷԿ-եր էր կառուցում, մյուսը հանգստյան գոտիներ ուներ Սևանի ցածրադիր հատվածներում: Հանդիպման ժամանակ Կարեն Կարապետյանն ասել է․ «Սիրում եմ Սևանը»: Բայց, իհարկե, դա ոչինչ չի նշանակում, եթե Սևանի մակարդակի բարձրացում է սպասվում մինչև 1903/5 մետր, դա արդեն լավ չէ, այն կարող է հարվածել ենթակառուցվածքներին, նաև հանգստի գոտուն: Նա երգում է այն նույն երգը, ինչ նախկին իշխանավորները:

Ինչ վերաբերում է ծառահատումներին, ապա պետք է ծառահատողների պոչը բռնել, սակայն փաստերով, միայն փաստերով: Նշենք, որ հաճախ ծառահատողները հենց փայտահատներ են, հաճախ անտառամերձ համայնքների բնակիչները, իսկ շատ հաճախ բիզնեսի համար են ծառեր կտրում: Հիմա փաստերով Կարեն Կարապետյանն ո՞ւմ պոչը պետք է բռնի:

Կարծ ասած՝ նախորդներից տարբերվում է Կարեն Կարապետյանը, նա խոսում է հետաքրքիր՝ հարգել բիզնեսին և այլն, սակայն նույնն է ասում, ինչ նախորդները: Այս գաղափարախոսությամբ բնապահպանության ոլորտում փոփոխություններ ակնկալելը զուր է:

NEWSPRESS.am