Տարոն Մարգարյանն իրեն շրջապատել է քրեական հեղինակություններո՞վ

Հաճախ է մամուլում հանդիպում, որ այս կամ այն քրեական հեղինակությունը զբաղվում է ընտրություններ կազմակերպելով։ Չգիտես` ինչու է այդպես ստացվել, սակայն թե′ իշխանությունը, և թե′ հանրությունը վստահում է է քրեականներին։ Երևի նրանք թե′ մեկի, թե′ մյուս հետ են ազնիվ։

Երկու դեպքում էլ իրավիճակն արտառոց է, սովորաբար, քրեական կամ թաղային հեղինակությունները մարդկանց մոտ որոշակի վստահություն են առաջացնում, նրանց, սովորաբար, դիմում եմ փողային հարցեր լուծելու կամ խռովածներին «բարիշացնելու» համար։ Իսկ իշխանությունները չեն կարող որոշ քայլեր անել առանց նրանց․ շատ անգամ հեղինակությունները սերտաճել են իշխանությանը կամ օգնելով իշխանությունների այս կամ այն խմբին ընտրվելու՝ ակնկալում են որոշակի պաշտոն։ Պաշտոն չուզելու պարագայում՝ նրանք պարտք են մնում հեղինակությանը՝ հատուցում են ըստ անհրաժեշտության։

Այս տարվա ԱԺ ընտրություններում հեղինակությունները դարձյալ ակտիվ էին, ակտիվ են նաև Երևանի ավագանու ընտրություններին։ Ըստ մամուլում շրջանառվող լուրերի՝ նախօրեին Երևանի քաղաքապետ Տարոն Մարգարյանն Աջափնյակում էր։ Այնտեղ լուրջ աշխատանք էին տարել քրեական տարրերը, մասնավորապես՝ ՀՀԿ ավագանու ցուցակում ընդգրկված Գարիկ Գրիգորյանը, որը հայտնի քրեական հեղինակություն Սերգեյ Գրիգորյանի՝ ԱՄՆ-ի բանտերից մեկում իր պատիժը կրող Ֆազի եղբայրն է: Գարիկ Գրիգորյանին խոստացել են նշանակել Աջափնյակի թաղապետ։

Ի դեպ, մամուլում նաև շրջանառվում էր, որ Երևանի ավագանու ՀՀԿ ցուցակը գլխավորող Տարոն Մարգարյանն ավագանու ընտրություններին մեծապես ապավինել է քրեական հեղինակությունների աջակցությանը: Օրինակ՝ ավագանու ՀՀԿ-ական անդամ Արմեն Սահակյանը՝ Ծիտը, այս օրերին ամբողջությամբ լծվել է Տարոն Մարգարյանի ընտրարշավին, նա Կենտրոն վարչական շրջանում շտաբ է բացել և մոբիլիզացնում է ուժերը։

Անգամ ՀՎԿ համագումարի ժամանակ Արթուր Բաղդասարյանը հատուկ շեշտել էր, որ «Սա թաղի տղերքի, քրեական հեղինակությունների ընտրություններ չեն»․ կարելի է ենթադրել, որ քրեական հեղինակությունները նրան չէին աջակցել, ինչն էլ պարտություն էր նշանակում․ այդպես էլ եղավ։

Ի դեպ, այս ԱԺ ընտրություններում Վանաձորում հնչած աղմկոտ կրակոցների գործով հարուցված քրեական գործի շրջանակներում կալանավորումներ են եղել, որի պարագլխին՝ քրեական հեղինակություն համարվող «Նեգր» մականունով հեղինակությանը, Վահրամ Բաղդասարյանի անմիջական ցուցումով և ջանքերով է հնարավոր եղել ազատ արձակել նախնական կալանքից․ նա համակարգում էր Վահրամ Բաղդասարյանի շտաբի աշխատանքները։

Չմոռանանք նաև, որ Դոն Պիպոն ԱԺ ընտրություններում պաշտպանում էր վարչապետ Կարեն Կարապետյանին։ Նշենք, որ Քանաքեռցի Տույն էլ այս ընտրություններում սատարում և աջակցում է Տարոն Մարգարյանին։

Հեղինակությունների այս ցանկն ավելի պատկառելի է, սակայն, որպես կանոն, նրանք գործում են սուսուփուս։ Տարոն Մարգարյանի ընտրվելու հավանականությունը շատ մեծ է․ նրան են աջակցում հեղինակությունները, սոցիոլոգ Ահարոն Ադիբեկյանը և վարչական ողջ ռեսուրսը։

NEWSPRESS.am