«Ձեզ ուղարկել են, ձեզ հաստատ ինչ-որ մեկը ուղարկել է». Երևանի թիվ 119 դպրոցում շտաբ է բացվել (ֆոտո)

Հանրակրթական դպրոցների հանրապետականացված տնօրենների անօրինություններն ընտրությունների նախաշեմին վերսկսվել են: Հավանաբար, նրանց թևերի տակ ձմերուկներ դրվեց, երբ ՀՀԿ խոսնակ Էդուարդ Շարմազանովը հայտարարեց, թե իրենք պաշտպանելու են իրենց կուսակից տնօրենների շահերը:

Թերևս սա առիթ տվեց մի շարք տնօրենների, որ Երևանի ավագանու ընտրություններին ընդառաջ, դարձյալ հանդես գան իրենց կարգազանցությամբ ու անօրինականությամբ:

Մասնավորապես՝ Երևանի Բենիամին Ժամկոչյանի անվան թիվ 119 ավագ դպրոցը վերածվել է նախընտրական շտաբի: Այդ մասին NEWSPRESS.am-ին ահազանգել էր դպրոցի ուսուցիչներից մեկը, ով, բնականաբար, չէր ցանկացել  բացահայտել իր անձը:

Նրա տված տվյալների հետքով՝ մեր թղթակիցն այսօր այցելեց դպրոց:

Նրան դիմավորած ոմն Մարիամը, հավանաբար, անմիջապես չընկալելով, որ իրենց մատնում է, հաստատեց լուրն այն մասին, որ դպրոցի մասնաշենքում շտաբ է բացված, որը, սակայն, բացվում է ժամը երկուսից ոչ շուտ:

Ավելին՝ տիկին Մարիամը մեր թղթակցին սիրով ուղեկցեց տնօրեն Հովհաննես Կարապետյանի ընդունարան: Վերջինս, լսելով հարցն այն մասին, թե ի՞նչ թույլտվությամբ է դպրոցում շտաբ բացել, անմիջապես ագրեսիվ ու նյարդային դրսևորում ցուցաբերեց: Նա հերքեց տեղեկությունը, թե դպրոցում շտաբ է բացված՝ ասելով, որ ինչպես գրեթե բոլոր դպրոցները, այնպես էլ իրենց մոտ ընտրական տեղամաս է և իր կասկածները հայտնեց այն մասին, թե սա «միտումնավոր այցելություն է, և ինչ-որ մեկը դրդել է մեզ»:

Արձագանքելով տնօրենին՝ նկատեցինք, որ մեզ եղել է ահազանգ, իսկ այն, որ դպրոցում նաև շտաբ է գործում, արդեն հասցրել է հաստատել նաև իրենց աշխատակցուհին: Լսելով այս ամենը՝ տնօրենն արագ բացեց դուռն ու կանչեց Մարիամին.
«Մարիա՛մ, Մարիա՛մ, արի՛ ստեղ… ի՞նչ ես ասել»,- ագրեսիվ տոնով հարձակվեց նա Մարիամի վրա: Վախվորած Մարիամը, չիմանալով ինչ պատասխանել, ասաց. «Ես բան չեմ ասել, Մարիետի հետ է խոսել…»:

«Բայց Դուք ասացիք, չէ՞, որ կողքի մասնաշենքում նաև շտաբ է»,-Մարիամին ուղղված մեր այս դիտարկմանն ի պատասխան՝ տնօրենն անմիջապես ոգևորվեց. «Բայց ինքն ո՞վ է, որ ասի, ինքն ո՛վ է…»,-չէր հանգստանում նա՝ այն աստիճան, որ Մարիամը դարձյալ վախվորած ձայնով նրա խոսքի հետևից կրկնեց. «Բայց ես ո՞վ եմ…»:

Իսկ տնօրեն Կարապետյանի ագրեսիվությունը հասավ իր գագաթնակետին մինչև իսկ այն աստիճան, որ սկսեց մեզ ուղղել անձնական վիրավորանքներ՝ նշելով, որ «ընկալման հետ խնդիր ունենք» և «ընտրական տեղամասը շտաբից չենք տարբերում»:
«Ձեզ ուղարկել են, ձեզ հաստատ ինչ-որ մեկը ուղարկել է…»,- նյարդայնացած կրկնում էր տնօրենը:

Դիտարկմանը, թե մենք ունենք լուսանկարներ, ու եթե տնօրենը ճիշտ է, ապա թող բացի կողքի մասնաշենքի դուռը, որտեղ շտաբն է, Կարապետյանը գոռաց. «Չե՛մ բացում… լավ եք արել, որ նկարել եք… արե՛ք ինչ ուզում եք: Ինչո՞ւ եք միտումնավոր եկել մեր դպրոց…»,- ասաց նա և այլևս չլսելով պատասխանը՝ հեռացավ:

Ի դեպ, դպրոցի դիմացի մայթին ևս Հանրապետական կուսակցության՝ Երևանի քաղաքապետի թեկնածու Տարոն Մարգարյանի նախընտրական շտաբն էր:

Սա նշանակում է, որ Շարմազանովը չէր սխալվում, դպրոցի տնօրեններն իսկապես իրենց գործընկերներն ու կուսակիցներն են: Բայց ցավալի է, որ կրթական համակարգը հանրապետականացված է ու քաղաքականացված:

Դպրոցների ՀՀԿ-ական տնօրենները, բնականաբար, կրթօջախներում պե՛տք է տանեն և տանում են իրենց կուսակցական «սև գործը»:

Այլ կերպ ասած՝ դպրոցները պահվում են ՀՀԿ-ի ազդեցության տիրույթում, հարկ եղած դեպքում՝ ուսուցիչներին օգտագործելով քաղաքական բնույթի գործընթացների մեջ. այս դեպքում՝ ընտրական:

Իսկ եթե չենթարկվեն, զրկվում են աշխատանքից: Հուսանք, որ Մարիամն իր հանկարծակի «մատնության» համար աշխատանքից չի ազատվի:

Հ.Գ. Մեր թղթակցի՝ դպրոց կատարած այցելության ողջ ընթացքը ձայնագրված է: