ԱԺ-ն այնպիսին է, ինչպիսին հասարակությունը. քաղտեխնոլոգ

Ընտրությունները Հայաստանում շատ կարևոր բան փոխեցին, ընտրությունների ինստիտուտը վերջնականապես դադարեց գոյություն ունենալուց։ Անդրադառնալով խորհրդարանական ընտրություններին ու ԱԺ պատգամավորների ցանկին՝ NEWSPRESS.am-ի հետ զրույցում իր տեսակետը հայտնեց քաղտեխնոլոգ Արմեն Բադալյանը։

Նրա գնահատմամբ՝ ընտրակաշառքի գործոնն, իհարկե, նախընտրական շրջանում միշտ մեծ դերակատարում է ունեցել, բայց երբեք այդքան վճռորոշ չի եղել, ինչպես ապրիլի 2-ի ընտրություններում։

«Հայաստանում ընտրությունների ինստիտուտը դադարեց գործելուց։ Բնականաբար, երբ ընտրությունների ինստիտուտը դադարում է գործելուց, և համատարած ձևավորվում է լրիվ այլ մեխանիզմ, ապա այդ գործառույթից ոչ մի սպասելիք չի կարելի ունենալ․․․ Ուղղակի խորհրդարանը կբացվի, կորոշվի ԱԺ նախագահն, ու պատգամավորների մեծ մասը կողմ կքվեարկեն առաջադրված թեկնածուին, բայց գաղտնի քվեարկությամբ, շաբաթական կլինի ԱԺ նիստ, որն օրվա օպերատիվ հարցերը կլուծի, սակայն քաղաքական հիմնական հարցերն այնտեղ չեն լուծվելու»,- իր գնահատականն է տալիս նոր ձևավորված խորհրդարանին քաղտեխնոլոգը։

Նա այս հարցում առանձնակի հույսեր չի կապում նույնիսկ «Ելք» դաշինքի անդամների հետ, ովքեր հանդես են գալիս որպես ընդդիմադիր։

Այս առումով Արմեն Բադալյանն այսօրվա խորհրդարանը համեմատում է նախկին ԱԺ-ի հետ, որտեղ կար քառյակ, որը հանդես էր գալիս որպես ընդդիմադիր և ավելի մեծ թվաքանակ էր կազմում ու բավականին ակտիվ էր, սակայն, ըստ վերլուծաբանի, նույնիսկ նրանց չէր հաջողվում հարցեր լուծել:

«Նրանք ոչ թե չկարողացան ժողովրդի շահերից բխող հարցեր բարձրացնել ու քննարկման դնել, այլ պարզապես մեծամասնությունը միևնույնն է Հանրապետականն էր, որը նախագծին կողմ կամ դեմ էր քվեարկում ու հարցերը լուծում այնպես, ինչպես իրեն է ձեռք տալիս»,- ասում է Արմեն Բադալյանն ու հավելում․ «Խորհրդարանն ունի Հանրապետական կուսակցությունը, «Ելք» դաշինքը՝ 9 պատգամավորով և «Ծառուկյան» դաշինքը, որն իրեն ընդդիմություն է համարել, սակայն իր ցուցակում տեղ գտած անդամներով ու գործելաոճով Հանրապետականից ոչնչով չի տարբերվում, բացի կուսակցական տոմսից: Եվ եթե դրան գումարենք նաև կոալիցիայի մեջ մտած և Հանրապետականի գծով վավերացված ՀՅԴ-ի պատգամավորներին, ովքեր ՀՀԿ-ին են միանալու, ապա մնում է միայն «Ելքի» 9 պատգամավորը։ Նրանց շատ-շատ 3-4 հոգի կարող է միանալ, որոնք սակայն, շատ հարցերում չեն կարող կողմ կամ դեմ քվեարկել՝ լավագույն դեպքում կարող են ելույթ ունենալ, քննարկել և գոռգոռալ, բայց արդյունք չեն գրանցի»:

Քաղտեխնոլոգի գնահատմամբ՝ ԱԺ մեծամասնությունը նախագահի վերահսկողության տակ գտնվող պատգամավորներ են, որոնք որևիցե հարց չեն լուծելու ինքնուրույն, լուծելու են Նախագահի նստավայրում։ Այս պարագայում ժողովուրդը, ըստ վերլուծաբանի, չի կարող մեծ ակնկալիքներ ունենալ։

«Ընտրակաշառքով ինքն է ընտրել այս խորհրդարանը: Միջինացված կարգով 50 տոկոսով ժողովուրդն իր քվեն վաճառեց իշխանությանը: Հիմա ժողովուրդի մի մասը, ով հնարավորություն ունի կհեռանա անմիջապես երկրից, մյուս մասը գլուխը կախ կփորձի հարմարվել իրավիճակին և ապրել»,- նկատեց վերլուծաբանը։ Նրա որակմամբ՝ Աժ-ն այնպիսին է, ինչպիսին հասարակությունը․ մրցունակ հասարակությունն ունի մրցունակ ԱԺ, իսկ ոչ մրցունակ հասարակությունը՝ անմրցունակ ԱԺ։