Ադիբեկյանը ներկայացրել է ՀՀԿ-ի ուղերձը

Երևանի ավագանու` մայիսի 14-ին կայանալիք ընտրություններին Հայաստանի Հանրապետական կուսակցությունը կստանա ընտրողների ձայների 67 տոկոսը, «Ելք» դաշինքը՝ 21 տոկոսը, «Երկիր Ծիրանի» կուսակցությունը՝ 12 տոկոսը: Այդ մասին այսօր ասուլիսի ժամանակ հայտնել է սոցիոլոգ Ահարոն Ադիբեկյանը։

Նշենք, որ Ահարոն Ադիբեկյանին, ՀՀԿ-ից և հենց Ադիբեկյանից բացի, ոչ ոք չի հավատում։ Նա, իհարկե, թվերը ստեղծագործում է՝ ըստ անհրաժեշտության, նաև ներկայացնում է, թե ինչպիսին են նախատեսված ապագա ընտրությունները։

Հանրությունը կարող է կողմնորոշվել, թե ինչ է որոշել ՀՀԿ-ն։

Երևանցիները մշտապես դժգոհ են տրանսպորտի վատ վիճակից, վարորդների անխնամ տեսքից և կոպիտ վերաբերմունքից, կանգնած երթևեկելուց, իսկ թե ովքեր են մտնելու Ադիբեկյանի «67 տոկոսի» մեջ, դժվար է ասել։ Կա′մ նա գնացել ՀՀԿ-ի շտաբի մոտ է հարցում արել, կա′մ էլ, որն առավել հստակ է՝ պարզ հանձնարարական է։

Ճանապարհների անմխիթար վիճակը, քաղաքապետարանի չարդարացված ծախսերը, քաղաքապետարանի տարբեր աշխատակիցների մեծ ու փոքր խախտումները, կառույցի անտրամաբանական կենսակերպը երևանցիներին հաստատ չի տրամադրում քաղաքապետարանի աշխատանքը դրական գնահատելուն։

Բացի այդ, Երևանում վատացել է կանաչապատման իրավիճակը, օդի աղտոտվածությունն ավելացել է, շինթույլտվություններն ավելի անտրամաբանական են և այսպես շարունակ։

Հիշեցնենք, որ Ադիբեկյանը, որն առավել հայտնի է «Սուդիբեկյան» ազգանունով, մշտապես ծառայություն է մատուցում իշխանություններին, և նրան պետք է լրջորեն վերաբերվել․ նա ներկայացնում է ընտրությունների իրական պատկերը, որն, իհարկե, հարցումների արդյունք չէ, սակայն կարևոր ազդակ է։

Յուրաքանչյուր ընտրությունից առաջ Ադիբեկյանն ապահովում է կանխատեսումը, Մուկուչյանը՝ ձայների քանակը, քրեականները՝ ընտրությունների անցկացումը․ արդյունքում ՀՀԿ-ՀՀԿ՝ մինչև անորոշ ժամանակ։

Այնպես որ՝ Ահարոն Ադիբեկյանը, թե որտեղից է պեղել 67 տոկոս ՀՀԿ-ի օգտին քվեարկողներ, միայն ինքը գիտի։ Հաստատ է այն, որ ՀՀԿ-ն Երևանի ավագանու ընտրություններում ունենալու է 67 տոկոս․ նրա առաքելությունն է տեղ հասցնել ՀՀԿ-ի որոշումը։

NEWSPRESS.am