Արմեն Ամիրյանը «ցավում է» Հյուսիսային պողոտայի նախկին բնակիչների համար (ֆոտո)

«Դատարանը կաշառատուն», «Զախարյանը Հյուսիսային պողոտայի բնակիչներին խաբեց-քցեց փողոց»․ այս մակագրությամբ պաստառներով այսօր կառավարության դիմաց էին եկել Հյուսիսային պողոտայի նախկին բնակիչները։

Արդեն 13 տարի փոխհատուցման ակնկալիքով կառավարության ու նախագահականի դիմաց բողոքի ակցիաներ կազմակերպող բնակիչներն այլևս հույսները կտրած վարչապետից ու նախագահից՝ սկսել են դիմել ում պատահի։ Հյուսիսային պողոտայի նախկին բնակիչներն NEWSPRESS.am-ի հետ զրույցում ասացին, որ այլևս հույս չունեն, բայց ուզում են հավատալ, որ որևէ մեկը կօգնի իրենց փոխհատուցման հարցում։

Այսօր կառավարության դիմաց նրանց այս ցուցակը համալրեց նաև Մշակույթի նախարար Արմեն Ամիրյանը։ Բնակիչները նրան էին մոտեցել՝ ակնարկելով, որ, ըստ էության, Հյուսիսային պողոտայի շենքերը պատմամշակութային արժեք էին ներկայացնում, և Մշակույթի նախարարից խնդրեցին հարցն այս տեսանկյունից արժանացնել վարչապետի ուշադրությանը։

Նրանք ներկայացրին նախարարին, որ 13 տարի առաջ զրկվել են իրենց բնակարաններից և մինչ օրս փոխհատուցում չեն ստացել, ինչի ի պատասխան Արմեն Ամիրյանը պատասխանեց․ «Ցավում եմ․․․»:

Այս պատասխանը, իհարկե, կարելի էր ակնկալել մի նախարարից, ում ձեռքին ոչինչ չկա։ Նա, բացի խորհրդից, ոչինչ չխոստացավ բնակիչներին։ Իսկ խորհուրդը հետևյալն էր՝ գրել նամակ վարչապետին, ինչն արդեն 13 տարի շարունակ անում են Հյուսիսային պողոտայի բնակիչները։