Գարշահոտությամբ ու կեղտով գնում ենք Երևանի ավագանու ընտրության (լուսանկարներ)

Կենտրոն վարչական տարածքի աղբահանությունը ժամանակին չի կատարվում: Մասնավորապես, NEWSPRESS.am-ի թղթակիցն ականատեսն է եղել, թե ինչպես է Աբովյան փողոցի շենքերից մեկի բակում աղբակույտ գոյացել:

Շենքի բնակիչների խոսքով՝ սա առաջին դեպքը չէ, երբ աղբը կուտակվում է, ու խնդրով զբաղվող չի լինում: Նրանք վստահեցնում էին, որ աղբն այստեղ կարող է օրերով մնալ: Ցավալին այն է, որ խնդրով զբաղվող գերատեսչությունները շատ հանգիստ ու անփույթ ձևով հարցը կարող են իրենցից հեռացնել՝ գնդակի նման նետելով մեկի դաշտից մյուսը:

Այսպես՝ աղբահանություն իրականացնող «Սանիտեք» ընկերությունը պնդում է, որ բակերում թափված աղբը համատիրության խնդիրն է, իսկ իրենք զբաղվում են միայն աղբարկղերի դատարկման խնդրով: Իսկ համատիրությունից վստահեցնում են, որ աղբահանությունն ուշանում է, քանի որ ժամանակին մեքենա չեն ուղարկում…

Այլ կերպ ասած՝ Հայաստանում աղբահանության ոլորտի կարգավորման հարցում, ինչպես միշտ, բացակայում է համակարգային մոտեցումը: Ու խնդիրն այստեղ նաև այն է, որ իրենք իրենց բացթողումը կա′մ չեն նկատում, կա′մ էլ չեն ամաչում բարձրաձայն հայտարարելուց, թե աղբահանության վիճակը գերազանց է: Սա այն դեպքում, երբ հենց քաղաքի կենտրոնում, հանդիպում ենք նման աղբակույտերի, որոնց կողքից հարկավոր է շունչդ պահած անցնես: Ահա այսպես, գարշահոտությամբ ու կեղտով գնում ենք Երևանի ավագանու ընտրության: