«Գնահատենք մեր հերոսներին քանի դեռ ողջ են». Լոս Անջելեսի հայերը սատարում են «Սասնա ծռերին» (ֆոտո, վիդեո)

Նախորդ տարի «Սասնա ծռեր» խմբի կողմից Երևանում ՊՊԾ գնդի գրավումից հետո, Լոս Անջելեսում նոյեմբերին ստեղծվել է նախաձեռնող խումբ՝ հաջակցություն «Սասնա ծռերի»:

Նախաձեռնող խումբն իր բողոքի ձայնն է բարձրացնում՝ պահանջելով ոչ միայն ազատություն տալ «Սասնա ծռերի» կալանավորված անդամներին, այլև օգնել նրանց:

Լոսանջելեսահայերի դիտարկմամբ՝ Հայաստանում ստեղծվել էր մի իրադրություն, որտեղ այլևս քաղաքական պայքարի հնարավորություն չկար, ուստի «Սասնա ծռերը» գնացին ծայրահեղ քայլի` այդ ձևով բարձրացնելով իրենց բողոքի ձայնը, որին միացավ ողջ հայ ժողովուրդը:

Խմբի անդամները հորդորում են բոլորին գնահատել հայրենիքի նվիրյալ հերոսներին և նրանց ընտանիքներին ու սատարել նրանց:

«Գնահատենք մեր հերոսներին, քանի դեռ ողջ են, ոչ թե սպասենք մահանան, հետո հիշատակենք, որ նրանք մեր հերոսներն էին»,- հայտարարում են խմբի անդամները՝ հավելելով, որ բոլոր նրանք, ովքեր պայքարում են ռեժիմի դեմ, իրենց բարեկամներն են:

«Ժողովուրդը հասել է այն ծայրահեղ գագաթնակետին, որ այլևս չի կարողանում իշխանությանը հանդուրժել, հանդուժել անօրինականությունները… Մարդիկ էլ համբերություն չունեն, պետք է իշխանությունը փոխվի»,- ասում է խմբի կանանցից մեկը` «Սասնա ծռերի» գործողությունները որակելով հերոսական քայլ:

Ըստ նրանց՝ սա կայծ էր, որ ժողովուրդը ոտքի կանգնի, ու ոտքի կանգնեց:

Խումբը հայտարարում է, որ իրենք ոչ մի կուսակցության չեն հարում և իրենց հիմնական նպատակը՝ «Սասնա ծռերի» տղաներին ու նրանց ընտանիքներին սատարելն է:

Խումբը կոչ է անում բոլոր նրանց, ովքեր մտածում են իրենց հայրենիքի ապագայի մասին և ունեն հնարավորություն՝ օգնության ձեռք մեկնեն տղաներին:

Նախաձեռնող խումբը կազմակերպել է դրամահավաք: Նրանք նաև վաճառքի են հանել իրենց սեփական իրերն ու այն ամենը, ինչից կարելի է գումար ստանալ, որպեսզի փոխանցեն «Սասնա ծռերին»:

Տեսանյութը՝ այստեղ