Վարչապետի դրայվը վերադարձել է

Վարչապետ Կարեն Կարապետյանն այս պահին անտառների կառավարման մակարդակը գնահատել է անբավարար։ Այսօր կառավարության նիստում, անդրադառնալով խնդրին՝ վարչապետը նշել է, որ վերջին ժամանակներս ավելի հաճախ են բարձրաձայնվում անտառահատումների և ապօրինի ծառահատումների հետ կապված մտահոգությունները:

«Խնդիրն առավել խորքային է և չի սահմանափակվում մի քանի ապօրինի անտառահատումների դեպքերով: Անհրաժեշտ է կատարելագործել անտառների կառավարման ներկա մոդելը և համապատասխանեցնել կառավարման ժամանակակից պահանջներին»,- նշեց Կարեն Կարապետյանը։

Նա գյուղատնտեսության նախարարությանը հանձնարարեց երկամսյա ժամանակահատվածում ախտորոշել անտառների պահպանության բնագավառներում հիմնական խնդիրները, հստակեցնել անտառների կառավարման և վերականգնման դերը։

«Հանձնարարում եմ Կառավարության աշխատակազմ ներկայացնել ոլորտի կարգավորման ուղղությամբ հստակ առաջարկությունների և գործողությունների ծրագիր, ներկայացնել ժամանակակից կառավարման մեթոդների գործիքների և տեխնոլոգիաների ներգրավման ծրագիր»,- ասաց վարչապետը:

Նա Բնապահպանության նախարարության բնապահպանական պետական տեսչության պետին մեկ շաբաթ տվեց, որպեսզի վերջինս ուսումնասիրի վերջին երեք ամսվա ընթացքում մամուլում և սոցցանցերում բնապահպանական հասարակական կազմակերպությունների կողմից ներկայացված դեպքերը, վերլուծի դրանք և հաշվետվություն ներկայացնի։

Վարչապետը գյուղնախարարությանն ու բնապահպանության նախարարությանը հանձնարարեց համագործակցել։