Կարեն Կարապետյանը միշտ էլ ՀՀԿ-ի ոտքերի տակ է մաքրում

Այն, ինչ արեց ԱԺ ընտրությունների նախընտրական շրջանում վարչապետ Կարեն Կարապետյանը, երևի թե երկրի համար ոչ ոք չէր արել: Նա ննջեցյալներից վերակենդանացրեց ՀՀԿ-ն, իսկ նման բան ոչ ոքի չէր հաջողվել: Հանրությունը կամա ակամա ընտրեց ՀՀԿ-ին, քանի որ գտավ, որ էլ ո՞վ, եթե ոչ ՀՀԿ-ն, հեղինակազրկված կուսակցությունները կարող են մրցակցել այս առումով և «ընտրվեց» չարյաց փոքրագույնը` ՀՀԿ-ն, այն էլ վարչապետի շնորհիվ:

Նա իր ետևից տարավ մի կուսակցություն, որին անգամ Գազպրոմ-Արմենիան ղեկավարելու տարիներին չէր անդամակցել, ոչ էլ Երևանի քաղաքապետ նշանակվելու ժամանակ: Հասկանալի է, դրա կարիքը չկար, իսկ վարչապետ նշանակվելուց հետո նա նետվեց ՀՀԿ-ի գիրկը` ինչո՞ւ:

Նախորդ երկու պաշտոններում նա առանձնապես առաքելություն չուներ. աշխատանք է՝ անում էր, նաև հարստանում էր: Չմոռանանք, որ հենց Գազպրոմ-Արմենիային ենք պարտական սպառողներին կրկնակի թանկ գազ վաճառելու համար` գրեթե կրկնակի սահմանին ստացվող գնից, հենց նրան ենք պարտական, որ տանը գազ ունենալու և սպասարկման համար առանց գլխացավանքների և կաշառատվության չի անցնում, էլ չենք խոսում գազի սպասարկման խայտառակ վիճակի մասին. այդ է վկայում ամեն տարի շմոլ գազից խեղդվողների պատկառելի ցանկը:

Քաղաքապետության ժամանակ նա կրկնակի թանկացրեց մետրոպոլիտենը, մարզերի տրանսպորտը հեռացրեց կենտրոնից, տեղափոխելով արվարձաններ` դժվարացնելով մարզաբնակների տեղաշարժը, «Կանաչ Երևան», «Մաքուր Երևան» ծրագրերը սառույցի վրա են, դեռևս 2011թ-ին պետք էր ներկայացվեր Երևանի երթուղային նոր ցանցը, աղբահանության ծրագրեր էր փորձում իրականացնել, որոնք վերջին հաշվով մնացին թղթին: Իսկ թե կոնկրետ ի՞նչ արեց Կարեն Կարապետյանը քաղաքապետի պաշտոնում, երևի թե ոչ ոք կոնկերտ չի կարող նշել, մնաց գեղեցիկ խոսքերը, թանկարժեք կոստյում, խոստումները, իսկ այդ բարիքներից մեր երկրում շատ կան. գեղեցիկ խոսքեր, դատարկ խոստումներ, թանկարժեք կոստյումներ, իսկ երկրում 70 տոկոս աղքատություն է:

Նշենք, որ վարչապետ նշանակվելուց հետո նա իր նախկին աշխտակաիցներին, ազգականներին, իմացող-չիմացողների նշանակեց աշխատանքի, ովքեր էլ իրենց հերթին իրենց ազգականներին, իմացող-չիմացողներին բերեցին իրենց հետևից, իսկ ի՞նչ փոխվեց` ոչինչ:

Այս շրջանում և մենաշնորհները մնացին, աղքատությունը չհաղթահարվեց, ներդրումները դեռևս դեգերում են օտար ամայի ճամփեքի վրա, աշխատավարձերը չավելացան, թոշակները մնացին ինչ որ էին և այսպես շարունակ:

Կարեն Կարապետյանի միակ ձեռքբերումը ՀՀԿ անդամակցությունն է, և ՀՀԿ-ի հաղթանակը ընտրություններում: Սա ո՛չ թե երկրի հաղթանակն էր, այլ` պարտությունը: Սա մեծ հաշվով հենց վարչապետի հաղթանակն էր` նա հաղթեց և՛ երկրին, և՛ ՀՀԿ-ին: Նա քարոզարշավին ասաց այն, ինչ-որ ասում էին օդից պաշտոնյաները, պարզապես Կարեն Կարապետյանն անկեղծացավ. ուզեք՝ ՀՀԿ-ն է, չուզեք` ՀՀԿ-ն է, ավելի լավ է ուզեք: