«Սա Ադրբեջանի պոռոտախոսությունն է, բայց թշնամին ոխակալ է, և բանակը միշտ պետք է պատրաստ լինի»

Քաղաքագետ Լևոն Շիրինյանն Ադրբեջանի պաշտպանության նախարար Զաքիր Հասանովի կոչը որպես սպառնալիք չի ընկալում: Ըստ նրա՝ դա պոռոտախոսություն է:

Նա NEWSPRESS.am-ի հետ զրույցում նշեց, որ դա ոչ թե պատերազմի կոչ է, այլ պատասխան մեկ օր առաջ տեղի ունեցած «Ազգ-բանակ-2017» համաժողովին, որտեղ հնչեցին բավականին շատ ելույթներ:

«Ցուցադրական ժողով են անում, էդ բոլորի պատասխանը դա էր լինելու: Պետք է ենթադրեին, որ ադրբեջանական կողմը դրան պատասխանելու է միանշանակ: Իսկ ընդհանրապես հարձակվողը նախապես չի հայտարարում, որովհետև հակառակորդ կողմը նախապատրաստվում է: Սա, իհարկե, պոռոտախոսություն է, բայց դա չի նշանակում, որ հայկական կողմը պետք է նստի և սպասի: Թշնամին ոխակալ է, և բանակը միշտ պետք է պատրաստ լինի»,- նկատեց քաղաքագետը:

Հիշեցնենք, որ Ադբեջանի պաշտպանության նախարար Զաքիր Հասանովն Ադրբեջանի ՊՆ-ի ընդլայնված կոլեգիայի նիստի ժամանակ զինուժին կոչ է արել պատրաստ լինել ակտիվ ռազմական գործողությունների: Նա նման կոչով հանդես է եկել ադրբեջանաղարաբաղյան սահմանին տեղի ունեցող զորավարժությունների արդյունքներն ամփոփելիս: Զորավարժություններին, ըստ ադրբեջանական ԶԼՄ-ների, մասնակցել է մոտ 30 000 զինծառայող, ավելի քան 100 տեսակի զինտեխնիկա և օդուժը:

Լևոն Շիրինյանը չի կարծում, որ Մինսկի խումբը կարող է միջնորդել խնդրի խաղաղ կարգավորմանը և սխալ է համարում հույսը դնել համանախագահների վրա:

«Ես անձամբ չեմ կարծում, որ կարելի է հույս դնել Մինսկի խմբի վրա: Մեր հարցի տերը մենք ենք, նրանք էլ միջնորդներն են,– ասում է քաղաքագետն ու իր համեմատականները բերում,- ո՞նց ասեմ՝ հարսանիքի համար տղան ու աղջիկը մերն են, իրենք էլ միջնորդն են: Այնպես որ՝ հայկական կողմին նորից պետք է հիշեցնել, որ ինքը պետք է խելքի գա, շատ նորմալ և ուժեղ պետություն, հասարակություն և բանակ ստեղծի և հարցը լուծի»:

Ըստ Լևոն Շիրինյանի՝ միջնորդները մեկ առաքելություն ունեն. նրանք առանձնապես կարծես պետք է խաղաղ վիճակը պահեն, բայց իրականում նրանք, արտաքին իմաստով, կոնֆլիկտը կառավարում են՝ իրենց հարմար ձևով, որը ոչ մի կապ չունի հայ ժողովրդի շահերի հետ:

«Իրենք երբևէ չեն խոսում կոնֆլիկտի տաքանալու պահին, այլ խոսում են ակցիան կատարելուց հետո: Է՛, դեռ քանի անգամ պետք է այդպես անել, որ մեր կողմը հասկանա, որ ոչ մի միջնորդ հարց չի լուծելու»,- նկատում է Շիրինյանը՝ հավելելով, որ ոչ մեկի վրա հույս պետք չէ դնել, իսկ ով կոչ կանի, որ հարկավոր է հույս դնել միջնորդների վրա, նա հորդորում է այդ մարդկանցից երես թեքել՝ ինչպես Լևոն Տեր Պետրոսյանից:

Քաղաքագետի դիտարկմամբ՝ Հայաստանի գործողությունները պետք է լինեն նախահարձակ և կանխարգելիչ հարվածներով:

«Գիտե՞ք, թե երբ կլինի այդպես, երբ գեներալների երեխեքը գնան առաջնագծում ծառայեն, ոչ թե բազար սարքեն, թե ով փող ունի, կրթություն ունի, կարող է չծառայել»,- նկատում է Լևոն Շիրինյանը:

Խոսելով շփման գծում հակառակորդի կուտակումների մասին՝ քաղաքագետը նկատում է, մեր կանոնադրությունը երաշխավորում է՝ ինքնապաշտպանության նպատակով հակառակորդ կողմը կարող է կանխարգելիչ գործողություններ անել թշնամու տարածքում: Ըստ նրա՝ հարկավոր է հենց տեղում ոչնչացնել հակառակորդին, սակայն մենք դա չենք անում, քանի որ երկիրը տնտեսական խնդիրներ ունի:

«Եթե մի երկիր ապրում է ներկրման հաշվին, ինքը տնտեսական պոտենցյալ չունի, այդ ամենն ուղղում է կուտակած փողը պահելուն: Եթե Հայաստանը լիներ պետական կապիտալիզմի պետություն, որտեղ 50+1 տոկոսը սեփականությամբ կլիներ պետությանը, պետությունն ինքը գործողություններ կաներ՝ ոչ մեկի վրա չթքելով: Բայց հիմա իրենք են պետությունը՝ այդ սեփականատերերը և իրենք սողում են իրենք իրենց դիմաց ու իրենց հարստության դիմաց»,-ասում է Շիրինյանն ու նկատում, որ երկրի զարգացման մոդելը պետք է փոխվի: