«ՀԺ». Մարտուն Գրիգորյանը Շիրակի մարզն է ուզում. Իսկ Դաշնակցությո՞ւնը

«Հայկական ժամանակ» թերթը գրում է.

«Շիրակի մարզը Ազգային ժողովում ներկայացնող նախկին պատգամավոր, 2017 թվականի խորհրդարանական ընտրություններում թիվ 11 ընտրական տարածքում՝ Շիրակի մարզում, ՀՀԿ-ի ռեյտինգային ցուցակ ընդգրկված Մարտուն Գրիգորյանը, որը բավարար քվեներ չունենալու պատճառով չի լինելու 6-րդ գումարման Ազգային ժողովում, ցանկանում է Շիրակի մարզպետ դառնալ:

Լավատեղյակ շրջանակներից ստացած տեղեկությունների համաձայն, ՀՀԿ-ում ունեցած խոսակցության ընթացքում Գրիգորյանն ակնարկել է Շիրակի մարզպետի պաշտոնը զբաղեցնելու մասին: Նույն աղբյուրները փոխանցում են, որ Շիրակի մարզպետի պորտֆելը Գրիգորյանին տալու կամ չտալու հարցով վերջնական որոշում չի կայացվել:

Մեր նախորդ հրապարակումներից մեկում տեղեկացրել էինք, որ ՀՀԿ էլիտայից հետընտրական շրջանում Գրիգորյանին առաջարկվել է զբաղեցնել ՀՀ տրանսպորտի, կապի և տեղեկատվական տեխնոլոգիաների կամ ՀՀ գյուղատնտեսության փոխնախարարի պաշտոններից որևէ մեկը: Գրիգորյանը, սակայն, փոխնախարարի պաշտոն չի ուզում:

Հիշեցնենք, որ Սահմանադրական հանրաքվեից հետո Շիրակի մարզը Սերժ Սարգսյանը «հանձնել էր» ՀՅԴ-ին: Դաշնակցական մարզպետ Հովսեփ Սիմոնյանն էլ ԱԺ ընտրությունների արդյունքներով ապահովագրել է իր տեղը ԱԺ-ում: Նա հարազատ կուսակցությանը խոստացել էր 10 հազար ձայն, բայց վերջնարդյունքում Շիրակից ՀՅԴ-ն ստացել էր 12 հազար 354 քվե»:

Մանրամասները՝ թերթի այսօրվա համարում