Նաիրիտցիների կողմից դատավորին ինքնաբացարկ հայտնելու մասին միջնորդությունը մերժվել է

Հիմք ընդունելով Քաղաքացիական դատավարության օրենսգիրքն ու դատավորի վարքագծի վերաբերյալ սահմանված կանոնները՝ «Նաիրիտի» նախկին աշխատակիցների ներկայացուցիչ, փաստաբան Տիգրան Սարգսյանը միջնորդություն էր ներկայացրել դատավորին՝ ինքնաբացարկ հայտնելու մասին: Մոտ 4 ժամ խորհրդակցական սենյակում մտածելուց հետո՝ դատավորը որոշել է մերժել միջնորդությունը: Այդ մասին NEWSPRESS.am-ի հետ զրույցում ասաց Տիգրան Սարգսյանը:

Հիմնավորելով ինքնաբացարկ հայտնելու միջնորդությունը՝ նա նկատեց, որ դատավորը ոչ միայն պետք է անկախ, անաչառ ու օբյեկտիվ վարի դատական գործընթացը, այլև այդպիսին պետք է ընկալվի հասարակության կողմից: Մինչդեռ, դատական նիստի մասնակիցներից շատերն անգամ իրեն դիմել են հարցադրմամբ, թե ինչո՞ւ էր դատավորը վատ տրամադրված նաիրիտցիների հանդեպ:

«Դատավորն այնպես պետք է անցկացնի դատական նիստերը, որ նրա միմիկաները, ժեստերն ու խոսքը չհայտնեն նրա դիրքորոշումը: Դատավորն իր դիրքորոշումը կարող է հայտնել միայն դատական ակտով, այսինքն՝ վճռով: Մինչև խորհրդակցական սենյակ գնալը, նա իրավունք չունի իր վերաբերմունքով որևէ նախատրամադրվածություն հայտնել: Բայց նախորդ դատական նիստերի ժամանակ նրա վարքագիծը խոսում էր նախատրամադրվածության մասին»,- ասում է Տիգրան Սարգսյանը:

Նա նշում է նաև, որ առաջին նիստը նման տպավորություն չի թողել, սակայն դրան հաջորդող դատական նիստերում արդեն նկատվել է կանխորոշության զգացողություն:

«Նաիրիտի» համակարգող խմբի անդամներն էլ նկատում են, որ դատական նիստերի անհարկի ձգձգումներն ու անհիմն հարցադրումները, կասկածի տակ են առնում դատավոր Նաիրա Հովսեփյանի անաչառությունը։

Փաստաբան Տիգրան Սարգսյանը չի անհանգստանում, որ միջնորդությունը մերժվել է:

«Երբ ես ներկայացնում էի միջնորդությունը, ինձ համար 50/50 էր՝ կընդունվի՞ այն, թե՞ կմերժվի, բայց կարծում եմ՝ նա այսուհետ ավելի զգոն կլինի և կհասկանա, որ գործ ունի գիտակից մարդկանց հետ: Կարծում եմ՝ այլևս դժգոհության առիթ չի լինի»,- մեզ հետ զրույցում ասում է փաստաբանն ու հավելում, որ Վերաքննիչ դատարանում մերժումը բողոքարկելու իրավունք ունեն, սակայն նա գոնե առայժմ չի կարծում, որ դրա անհրաժետությունը կա:

Հիշեցնենք, որ Շենգավիթ վարչական շրջանի ընդհանուր իրավասության դատարանում դեռևս շարունակվում է «Նաիրիտ» գործարանի նախկին 18 աշխատակիցների՝ «Նաիրիտ-2» ՓԲԸ-ի հետ կնքած պահանջի իրավունքի զիջման պայմանագիրը մասնակի անվավեր ճանաչելու մասին հերթական դատական նիստը:

Տվյալ գործով հերթական դատական նիստը տեղի կունենա ս/թ հունիսի 1-ին։